Innuttaasut 6 mio.kr.-nik pisassaqarput. Illit akornaniippit?


Sullissivik.gl-imi aningaasanik pissaqarnerlutit nammineerlutit takusinnaallugu– imaluunniit pisortanut qanoq akiitsoqartiginerlutit takusinnaallugu nalunngiliuk?

Innuttaasut suliffeqarfiillu amerlasuut pisortanut akiligassatik annerusumik minnerusumilluunniit ilisimaneq ajorpaat. Pisortanut akiitsunut, assersuutigalugu meeqqanut akilersuutinut akilerneqanngitsunut, eqqaavilerinermut akiligassanut, akileraarutissat sinnerinut, atuagaateqarfimmut akiligassanut imaluunniit innaallagissamut/imermut akiligassanut ilaatigut atuuppoq. Taamaattorli aamma aningaasanik pissaqarsinnaavutit, kisiannili aningaaserivimmi kontup normua pisortanit pigineqanngimmat pisortanit aningaasanik tunineqarsinnaanak.

Inuinnartut imaluunniit inuussutissarsiummik ingerlataqartutut pisortanut akiligassaasinnaasut Sullissivik.gl-imi tamakkiisumik takusinnaavatit. Kontup assilinerani akileraarutit aamma pisortanut akiitsut akiliisitsiniartarfimmut nassiunneqarsimasut nammineerlutit takusinnaavatit. Pisortanut akiligassatit uani takusinnaavatit.


Innuttaasut 6 mio.kr.-nik pissaqarput

Akileraartarnermut Aqutsisoqarfiup innuttaasut 1.400-it missaanniittut ukiumit siulianit akileraarutinit utertoorutissanit pissaat 6 mio.kr.-usut naatsorsorsimavai. Innuttaasut taakku aningaaserivimmi kontup normuanik ilisimatitsissuteqarsimanngillat. Innuttaasut ataasiakkaat tamatuminnga ilisimatitsereerpata Akileraartarnermut Aqutsisoqarfik aatsaat ikisisinnaavoq.

Aningaaserivimmi paasissutissat eqqortut Akileraartarnermut Aqutsisoqarfimmit pigineqarnissaat illit innuttaasutut qulakkeertussaavat. Sullissivimmi kontup assilinerani pissaqartutit takusinnaagukku immersugassaq immersussavat Akileraartarnermullu Aqutsisoqarfimmut nassiullugu. Matuma kingorna Akileraartarnermut Aqutsisoqarfik aningaaserivimmi kontumut ikisisinnaassaaq. Immersugassaq ukunani aaneqarsinnaavoq.


Akiitsunnut tunngatillugu ikiorneqarsinnaavutit

Akileraartarnermut Aqutsisoqarfik pisortat innuttaasunit suliffeqarfinnillu pissaannik akiliisitsiniartarnermik suliaqartarpoq aammalu Qaqortumi, Nuummi, Maniitsumi, Sisimiuni Ilulissanilu sulisoqarluni. Taamaammat innuttaasut suliffeqarfiillu pisortanut akiitsut akilernissaannut toqqissillutik ikiorneqarlutillu ilitsersorneqarsinnaapput. Akileraartarnermut Aqutsisoqarfik innuttaasunut sullissivinni immikkoortuni, oqarasuaatikkut e-mailikkullu pissarsiarineqarsinnaavoq.


Sullissivik.gl

Pisortat kiffartuussineri tamarmik illit digitalikkut sullinneqarnissannut naleqqulluartut sullissivik.gl-imi ataatsimoorput, assersuutigalugu tassani digitalikkut allagarsiatit takusinnaavatit, nuunnerit nalunaarutigisinnaavat, piniarnermut allagartat, najugaqarnermut uppernarsaatit aasinnaavatit akileraarutinullu il.il. tunngasut tamakkiisumik takusinnaavatit.
Sullissivik.gl-imut isersinnaajumallutit NemID-eqassaatit. NemID-qanngikkuit imaluunniit e-Boksimut isersinnaanngikkuit kommunimmi innuttaasunut sullissivimmut saaffiginnissaatit, tassani NemID-mik peqalernissannut ikiorneqarsinnaavutit.