2021-IMUT SORAARNERUSSUTISIAQALERNISSAMUT AAQQISSUUSSINERMUT PEQATAASUSSAATITAANEQ PILLUGU NUTAARSIASSAQ

Pension_3

Januarip aallaqqaataani 2021-imi soraarnerussutisiqalernissamut aaqqissuussinermut peqataasussaatitaaneq pillugu inatsit allanngortinneqassaaq. 2021-imi januarip aallaqqaataaniit akiliinissamut paasissutissanillu uppernarsaanermut periarfissat nutaat atuutilissapput.

 

Soraarnerussutisiaqalernissamut aaqqissuussinermut peqataasussaatitaaneq pillugu inatsisip allanngortinneqarnissaa, 2020-imi novembarip 25-ani Inatsisartunit aalajangiiffigineqarpoq. Inatsisip allanngortinneqarnera ilinnut sunniuteqarsinnaavoq. Inatsit allannguutaalu uani takusinnaavatit.

 

  • 2018-imut 2019-imullu ileqqaartussaatitaaninnut naammassinnissimanngikkuit, 2021-mi januarip aallaqqaataaniit, illit soraarnerussutisiaqalernissamut aaqqissuussininnut akiligassatit, suli akilersimanngisatit akilersinnaavatit. Tamanna pereerpat akiliisimanerit uppernarsassavat tamatumalu kingorna akileraartarnermut allagartaq nutaaq tunniunneqarsinnaalissaaq.

    Malugiuk: Periarfissaq taanna 2021-miit aatsaat atuutilissammat.

  • Danskit tjenestemandinut inatsisaat malillugu atorfeqaruit, innuttaasunut tjenestemandit inatsisaat allat malillugit atorfilinnut aningaasarsiatit naleqqiunneqassapput (inatsimmi § 4, imm. 1, nr. 1, 2 aamma 3). Tamanna aamma ima isumaqarpoq, danskit tjenestemandinut inatsisaat malillugit akiliutit tiguneranni, ileqqaarnissamut tunngavissat naatsorsorneqarneranni ilanngunneqassanngimmata. Isertitatit allat ileqqaarnissamut tunngavissat naatsorsorneqarneranni suli ilaapput. Allannguut inatsisip atuutilerneraniit atuutilissaaq, 2020-imili aningaasarsiatit aamma ilaapput.

  • Innuttaasut piffissami sivikinnerusumi Kalaallit Nunaanniittut danskit Kalaallillu Nunaanni soraarnerussutisiaqalernissamut aaqqissuussinermut ileqqaagaqarnissamut peqataannginnissamut qinnuteqarsinnaapput. Peqataannginnissamut akuerineqassagaanni Islandimeersuuneq, Savalimmiuniit, Norgimiit imalt. EU-mi nunat arlaanneersuunissaq taakkunanilu ileqqaagaqartuunissaq piumasaqaataavoq.Tamatumalu saniatigut qinnuteqarninnut atatillugu nalunaarutigissavat ukiut aningaasarsiorfiusut marluk (ullorsiutit malillugiunngitsoq) sinnernagit maaniinnissat naatsorsuutigigit. Akileraartussaatitaanerpit atuutilerneraniik kingusinnerpaamik qaammatit pingasut qaangiutsinnagit peqataannginnissamut Akileraartarnermut Aqutsisoqarfimmut qinnuteqarsinnaavutit.

  • Akiliinissamut minnerpaaffiliussaq 1.000 kr.-iniit 2.000 kr.-inut allanngortinneqarpoq.

  • Ileqqaartussaatitaanerit nalinginnaasumik (pisortatigoortumik) ukiut soraarninngorfissat ukiunik sisamanik sioqqullugu taamaatissaaq. 2021-miit ileqqaartussaatitaanerit taamaattumik ukioq 63-iliiffiit aallarnerfigalugu taamaatissaaq. Soraarnerussutisiaqalernissannut ileqqaagaqarnerit soorunami ingerlatiinnarsinnaavat. Inatsisitigulli tamanna piumasaqaataanngilaq.

  • 2020-mi, 2021-mi 2022-milu akissarsiallit minnerpaamik 6%-inik ileqqaagaqassapput. Namminersorlutik inuussutissarsiutillit minnerpaamik 4%-inik ileqqaagaqassapput. Tamatuma kingorna kisitsisit ukiumut 1 %-imik qaffanneqartassapput, akissarsialinnut 10 %-i namminersorlutillu inuussutissarsiutilinnut 6%-i nallernissaasa tungaannut.











    Apeqqutissaqaruit Akileraartarnermut Aqutsisoqarfik attavigiuk, oqarasuaat + 299 34 65 00, mail: tax@nanoq.gl