2019-imut tunngatillugu inaarummik naatsorsuut nassiunneqalerpoq – Utertoorutinik pissaqarpit ?


2019-imut tunngatillugu inaarummik naatsorsuut nassiunneqalerpoq – Utertoorutinik pissaqarpi t ?

Innuttaasut 23.000-init amerlanerusut akileraarutinut akiliivallaarsimanertik pissutigalugu ukioq manna utertuussapput, innuttaasullu 10.000-init ikinnerulaartut akileraarutinut akiliinikippallaarsimanertik pissutigalugu akileeqqissallutik.

Inaarummik naatsorsuut augustip naalernerani nassiunneqartarpoq. Tassani takutinneqartarput siorna aningaasarsiarisimasatit, ilanngaatitit akileraarutitillu. Utertoorutissaqarnerlutit imaluunniit siorna akileraarnikippallaarsimanerlutit takusinnaavat. Utertuussaguit aningaasat kontunnut ingerlaannaq ikineqarnissaat Akileraartarnermut Aqutsisoqarfimmit amerlanertigut isumagineqartarpoq. Ingerlaannarli ikisinissaq taamaallaat pisinnaavoq aningaaserivimmi kontut pillugu paasissutissat nammineerlutit nalunaarsuiffinni nalunaarutigisimagukkit. Pisortanut akiitsoqaruit taakkununnga akiliisinneqassaatit, sinneruttullu ilinnut tunniunneqassallutik.

Inaarummik naatsorsuut NemID atorlugu www.sullissivik.gl-ikkut takuneqarsinnaalissaaq ulloq 20. august 2020.

Innuttaasut amerlasuut aningaasaqarnikkut inissisimanertik paasissallugu soqutigisarmassuk tupinnanngilaq. Taamaattumik Akileraarutikka www.sullissivik.gl-imiittoq  aamma Akileraartarnermut Aqutsisoqarfik ullormi 20. august piffissamilu tamatuma kingorna  innuttaasunit amerlasuunit saaffigineqartarput. Taamaattumik www.sullissivik.gl-ikkut anngunneq ajulissagaluaruit kingusinnerusukkut misileeqqinnissat kajumissaarutigaarput. Ulluni taakkunanerpiaq oqarasuaatikkut e-mailikkullu saaffiginninnermi kiisalu Akileraartarnermut Aqutsisoqarfiup innuttaasunik sullissiviinut ornigunnermi utaqqinarsiinnaanerata naammagittarfigineqarnissaa Akileraartarnermut Aqutsisoqarfiup neriuutigaa. 


Innuttaasut amerlasuut akileraarutinut akiliivallaarutiminnik utertuussapput

Ukiumut akileraarfiusumut 2019-imut tunngatillugu akileraarutinit utertoorutissat 187 mio. kr.-it Akileraartarnermut Aqutsisoqarfiup inunnut 23.791-inut 28. august 2020-mi utertissavai.

Kommunerisannut, Namminersorlutik Oqartussanut imaluunniit suliffeqarfinnut, Akileraartarnermut Aqutsisoqarfiup akiliisitsiniarnermik sullitaanut akiitsoqaruit (soorlu ineqarnermut akiliutinut, innaallagissamut, imermut kiassarnermullu), taava taakku akilersinneqassapput aningaasallu sinneruttut ilinnut tunniunneqassallutik. Taamaaliortoqarpat tamanna pillugu ilisimatinneqassaatit.


Innuttaasut ilaasa aningaasat piffissaq eqqorlugu tigunngitsuussavaat

Akileraartarnermut Aqutsisoqarfik, aningaaserivimmi paasissutissanik ilinnut tunngasunik, tassa registreringsnormumik kontonormumillu, tigusaqartinnani aningaasanik ilinnut tunniussisinnaanngilaq. Innuttaasut 7.000-init amerlanerusut kontonormortik Akileraartarnermut Aqutsisoqarfimmut nalunaarutigisimanngimmassuk aningaasat amerlasuut ullormi 28. august 2020-mi tunniunneqarsinnaanngillat. Taakku saniatigut innuttaasut 172-it aningaaserivimmi kontonormu eqqunngitsoq nalunaarutigisimavaat. Taamaattumik aningaaserivimmi paasissutissat ilinnut tunngasut eqqortut Akileraartarnermut Aqutsisoqarfiup pissarsiarisimanerai qulakkeerukku silatusaarnerussaaq.

Aningaaserivimmi kontut pillugu paasissutissat nammineerlutit nalunaarsuiffinni allattussaagaluarpatit, taamaaliorsimanngikkuilli immersugassaq Akileraarutit sippuutaannik qinnuteqaatitut allattuiffissaq immersorsinnaavat. Taanna Akileraartarnermut Aqutsisoqarfiup nittartagaani uaniippoq Innuttaasunut, immersuiffissat, akileraarutit sippuutaannik qinnuteqaatitut allattuiffissaq, kiisalu aamma Akileraartarnermut Aqutsisoqarfiup nutaarsiassaataaniilluni. Aningaasat 28. august tunniunneqarnissamut angumersissappata immersugaq Akileraartarnermut Aqutsisoqarfimmut kingusinnerpaamik tunniunneqarsimassaaq ulloq 25. august.

Paasissutissat

187 mio. kr.-it ilaat 50,5 mio. kr.-it (tunniunneqartussat tamarmiusut 27%-iisa missingi) ilanngaassinikkut, inangiinikkut arsaarinninnikkulluunniit pisortanut akiitsunut matussutissatut akilersinneqarput.

22,6 mio. kr.-it nunatsinni kommuninut, INI A/S-imut, Iserit A/S-imut aamma Nukissiorfinnut il.il. akiitsunut matussutissatut akilersinneqarput, sinneruttullu 27,8 mio. kr.-it Namminersorlutik Oqartussanut akiitsunut matussutigineqarlutik. 


Akileraartarnermut Aqutsisoqarfiup ukiumut akileraarfiusumut 2019-imut tunngatillugu akileraarutinit utertoorutissat 12,1 mio. kr.-it 2020-mi upernaakkut tunniuppai.

12,1 mio. kr.-it ilaat 1,5 mio. kr.-it (tunniunneqartussat tamarmiusut 13%-iisa missingi) ilanngaassinikkut, inangiinikkut arsaarinninnikkulluunniit pisortanut akiitsunut matussutissatut akilersinneqarput.

452 t.kr.-it nunatsinni kommuninut, INI A/S-imut, Iserit A/S-imut aamma Nukissiorfinnut il.il. akiitsunut matussutissatut akilersinneqarput, sinneruttullu 1,1 mio. kr.-it Namminersorlutik Oqartussanut akiitsunut matussutigineqarlutik.


Akileraarutissat sinneri

Akileraarutinut akiliinikippallaarsimaguit taakku akileraarutissat sinnerisut akiligassiissutigineqassapput. Akileraarutissat sinnerinik akiliissanerlutit inaarummik naatsorsuummi takusinnaavat. 


Paasissutissat

2019-imut akileraarutissat sinneri 155,9 mio. kr.-it akileraartartunut 9.984-inut akiligassiissutigineqassapput. Taakkunannga 52 mio. kr.-it 2021-imut siumoortumik nalunaarsuinermut atatillugu nuunneqassapput, sinnerilu 103,8 mio. kr.-it qaammatini pingasuni naafferaartumik akiligassatut akiligassiissutigineqassallutik, tassa ulluni 1. september, 1. oktober aamma 1. november 2020-mi akiligassanngortussat, piffissaagallartillugulu akiliiffissaq kingulleq tassaassalluni qaammatit taakku ulluisa 20-at.

Akileraarutissat sinnerinut 2021-mut nuunneqartunut ernialiussaq 6%-iusoq akilernianngikkukku, taava akileraarutissat sinneri nuunneqartut nammineq piumassutsit tunngavigalugu akilersinnaavatit kingusinnerpaamik ulloq 20. november 2020.

Akileraarutissat sinnerinik nuunneqartunik akiliinissaq pissaaq Akileraartarnermut Aqutsisoqarfiup Grønlandsbanken A/S-imi kontuanut: tassa Reg.nr. 6471 konto nr. 1002608.

Akileraarutissat sinnerinik nammineq piumassutsimik akiliinermi (§ 5) makku oqaasertaliiffissami nalunaarneqassapput:

  • Inuttut normut
  • Ukioq aningaasarsiorfik akiliiffiusoq: assersuutigalugu 2019
  • § 5

Akiliinermi oqaasertaliussassap assersuut una malissavaa: 010101-0101 2019 § 5 



Pigisanit pissarsiat ilaasa akileraarutaat (KAS) pillugu 2019-imut inaarummik naatsorsuut

Pigisanit pissarsiat akileraarutaannut akiliinikippallaarutinik akiliinissaq Pigisanit pissarsiat ilaasa akileraarutaat (KAS) pillugu 2019-imut inaarummik naatsorsuummi allaqqavoq.

Soraarnerussutisiaqalernissamut aaqqissuussiffigisat pigisanit pissarsiat akileraarutaannut akiliivallaarsimappat, taava aningaasat akiliivallaarutaasut illit soraarnerussutisiaqalernissamut aaqqissuussannut utertinneqassapput.

Illit nammineerlutit pigisanit pissarsiat akileraarutaannut akiliivallaarsimaguit, taava aningaasat akiliivallaarutaasut illit kontunnut ikineqassapput.

Akileraarutinit utertoorutissatuulli matumanissaaq konto pillugu paasissutissat eqqortut pisariaqartippavut. Taamatuttaaq pisortanut, Namminersorlutillu Oqartussat selskabiutaannut aamma Iserit A/S-imut akiitsut ilanngaatigineqassapput.

Akiliinikippallaarsimaguit pigisanit pissarsiat akileraarutaannut akiliinikippallaarutit akilissavatit. Aningaasat inaarummik naatsorsuummi allaqqassapput.

Pigisanit pissarsiat akileraarutaannut akiliinikippallaarutit akiligassanngussapput ulloq 1. september 2020, piffissaagallartillugu akiliiffissaq kingulleq tassaalluni 1. oktober 2020.

 

Soraarnerussutisiaqalernissamut aaqqissuussinermut peqataasussaatitaaneq pillugu 2019-imut ukiumoortumik naatsorsuutip takutippaa soraarnerussutisiassannut akiliutigisimasatit naammannersut

Ukiumoortumik naatsorsuut aammattaaq augustimi nassiunneqartarpoq. Tassani takusinnaavat soraarnerussutisiaqalernissamut ileqqaakkannut inatsisip piumasarisaatut akiliisimanerit Akileraartarnermut Aqutsisoqarfimmit nalunaarsorneqarsimanersoq.

Soraarnerussutisiaqalernissamut aaqqissuussinermut peqataasussaatitaaneq akileraarutaanngilaq, tassallunili illit nammineq soraarninngornissannut akiliutit.

Ukiumoortumik naatsorsuummi allaqqavoq soraarnerussutisiassannut akilersimanngisaqarnersutit taakkulu qanoq amerlatiginersut. Innuttaasut soraarnerussutisiassaminnut nammineerlutik imaluunniit sulisitsisortik aqqutigalugu 2019-imi akiliisimanngitsut, ukiumoortumik naatsorsuutip ullulerneqarneraniit sapaatip akunnerinik sisamanik piffissalerneqarput nammineq soraarninngornissaminnut akiliinissamut.

Soraarnerussutisiassannut 2019-imi akiliinikippallaarsimaguit, soraarnerussutisiassannullu akiliinissamut sapaatip akunnerinik sisamanik, akiliinerlu taanna pillugu Akileraartarnermut Aqutsisoqarfimmut uppernarsaanissamut piffissalerneqarnerit malinngikkukku, taava kingunerissavaa nammineq soraarninngornissannut akiliinissavit 2021-mi akileraarusiissutissap procentiata qaffanneratigut pinissaa. Procentip akileraarusiissutissap qaffaataa 2021-mi 7%-iussaaq.

Akiliinerit qanoq iliorlutit uppernarsassanerit Akileraartarnermut Aqutsisoqarfiup nittartagaani uani takusinnaavat Innuttaasunut, Soraarnerussutisiat. Tassanissaaq soraarnerussutisiaqalernissamut aaqqissuussinermut peqataasussaatitaaneq pillugu, aamma soraarnerussutisiassannut akileeqquneqarnerit sunik pissuteqarsinnaanersoq pillugu paasisitsiniaalluni takutitassiat sisamat takusinnaavatit. Kiisalu soraarnerussutisiassannut akiliinerit qanoq iliorlutit uppernarsarsinnaanerit tassani takusinnaavat.


Qulaani allassimasut pillugit apeqqutissaqaraanni

Attavissaavoq Akileraartarnermut Aqutsisoqarfik, Intaleeqqap Aqqutaa 1, Postboks 1605, 3900 Nuuk, oqar. + 299 34 65 00, mail: tax@nanoq.gl