Kalaallit Nunaanni akunnittarfinni 2020-mi unnuinerit sulinngiffeqarnermi akiliunneqarluni angalanermut akileraaruteqaataasussaanngitsumut ilaatinneqarput


2020-mi sulinngiffeqarnermi akiliunneqarluni angalanerit pillugit maleruagassat nutaat isumaqatigiissutaanerat uani takuuk.

Sulinngiffeqarnermi akiliunneqarluni angalanerit pillugit akileraartarmi maleruagassaq atuuttoq

Maleruagassat Kalaallit Nunaanni tjenestemandinut atuuttut naapertorlugit akiliunneqarluni angalanerit nalingat, aningaasarsianit akileraarutit pillugit inatsimmi § 34, imm. 1, nr. 15 malillugu akileraaruserneqartussaanngilaq. Sulinngiffeqarnermi akiliunneqarluni angalaneq ukiumut ataasiinnaq akileraaruserneqartussaanngilaq.

Sulinngiffeqarnermi akiliunneqarluni angalanerit akileraaruserneqartussaanngitsut 2020-mi ilaneqarnerat

Sulisut kattuffii arlaqartut Namminersorlutillu Oqartussat ilassutitut isumaqatigiissummik majimi atsiuipput, taamaalillutik sulinngiffeqarnermi akiliunneqarluni 2020-mi angalanerit Kalaallit Nunaanni akunnittarfinni unnuinernik ilaneqarsinnaanngorlugit. Assigiinngitsunilli killiliussaqarpoq.

Angalanerup akunnittarfimmilu unnuinerup katillutik akiata aningaasat akileraaruserneqartussaanngitsut qaangersimassanngilai. Angalanerup akia aningaasanit akileraaruserneqartussaanngitsunit minneruppat, taava aningaasat sinneruttut akunnittarfimmi unnuinermut atorneqarsinnaapput. Angalanerup akunnittarfimmilu unnuinerup ataatsimoortillugit inniminnerneqarnissaat piumasaqaataavoq.

Angalanerup immaqalu akunnittarfimmi unnuinerup akiata aningaasat akileraaruserneqartussaanngitsut sipporpagit, aningaasat sippuutaasut akileraaruteqaataassapput, taakkulu sulisitsisup aningaasarsiat allagartaanni ukiumoortumi nalunaarutigissavai. 

Sulisitsisoq angalanerup akunnittarfimmilu unnuinerup saniatigut allanik tamakkiisumik ilaannakuusumilluunniit akiligaqarsimappat, taakku akissarsianut ilanngunneqassapput. Aningaasartuutit sulisitsisumit akilerneqartut tamarmik uppernarsaatissaqartinneqarnissaat piumasaqaataavoq. 

Angalanissap akunnittarfimmilu unnuinissap angalatitsivik/billetsiliuussisoq aqqutigalugu ataatsimoortillugit inniminnerneqarneranni faktura sukumiisumik allattorneqassaaq, taamaalillutik akilerneqartussat suuneri qanorlu akeqarneri tamarmik immikkut erseqqissumik paatsuugassaanngitsumillu allassimassallutik. Imaappoq, assersuutigalugu ”angalanissamik aaqqissuussineq” taassumalu akia tamarmiusoq kisiisa fakturami allassallugit naammanngilaq.

Sulisitsisup piffissami, sulinngiffeqarnermi akiliunneqarluni angalaffiusumi siumut utimullu angalanerup qanoq naleqarnera (sumiiffiup atorfeqarfigisap Københavnillu akornanni siumut utimullu angalanermut billetsip akia) pillugu uppernarsaammik toqqortaqarnissaa inassutigineqarpoq. 

Assersuut

Nuummiit Københavnimut uterlugulu angalaneq 9.300 kr.-neqarpoq.

Angalasup Air Greenlandimut ilaalluni Nuummiit Ilulissanut uterlugulu angalanera 5.990 kr.-eqarpat aningaasat sinneruttut, 3.310 kr.-it pineqartup Ilulissani akunnittarfimmi unnuineranut akileraaruserneqartussaanngitsumik atorneqarsinnaapput. Angalanerup akunnittarfimmilu unnuinerup katillutik akiata 9.300 kr.-it sipporpagit, aningaasat sippuutaasut akileraaruteqaataassapput akissarsiallu allagartaanni ukiumoortumi sulisitsisumit nalunaarutigineqartussaallutik.

Angalasoq sulinngiffeqarnermini, atorfinitsitaanermi isumaqatigiissut naapertorlugu 5.000 kr.-inik 20.000 kr.-inilluunniit pisassaqarsimappat, tamanna akileraarusiinissami aalajangiisuussaanngilaq. Akileraaruserneqartussaanngitsoq tassatuaavoq Nuummiit Københavnimut uterlugulu angalanerup nalinga. Sulisitsisoq amerlanerusunik akiliippat, soorlu 20.000 kr.-inik, taava taakku nikingassutaat, 10.700 kr.-it pissarsisumut akileraaruteqaataassapput. Aningaasat taakku, 10.700 kr.-it sumut atorneqarsimanerat akileraarusiinissami aamma aalajangiisuunngilaq.

Nalunaarutiginnittarneq

Sulisitsisup sulinngiffeqarnermi akiliunneqarluni angalanerit pillugit nalunaarutiginnittussaanera pillugu imaluunniit paasissutissat nalunaarutigineqartussat pillugit allannguisoqanngilaq.
Sulisitsisup nalunaarutiginnittarneranut tunngasut uani takukkit.