Skattekortit aamma Soraarnerussutisiaqalernissamut aaqqissuussinermut peqataasussaatitaaneq

Pension_3


Skattekortit aamma Tunisinermi akileraarutit allagartaat ukiumi aningaasarsiorfiusumi 2020-mi atorneqartussat Akileraartarnermut Aqutsisoqarfiup ulluni makkunani nassiussorpai.


Innuttaasut 33.000-init amerlanerusut Soraarnerussutisiaqalernissamut aaqqissuussinermut peqataasussaatitaaneq pillugu Inatsisartut inatsisaat naapertorlugu soraarnerussutisiaqalernissamut ileqqaartussaatitaanertik ukiumut aningaasarsiorfiusumut 2018-imut tunngatillugu naammassisimavaat. Innuttaasut soraarnerussutisiaqalernissamut ileqqaartussaatitaanerminnik naammassinnissimanngitsut skattekortinik tapiliussamik 6%-iusumik qaffaavigineqarsimasunik, immaqalu tunisinermi akileraarutinut allagartanik tapiliussamik 4%-imik qaffaavigineqarsimasunik pissapput.


Tapiliussaq taanna 2018-imi ileqqaartussaatitaanerup naammassineqarsimannginneranik pissuteqarpoq. Akileraartarnermut Aqutsisoqarfiup soraarnerussutisiaqalernissamut ileqqaartussaatitaanermik naatsorsuinermini sulisitsisut nalunaarutaat ilaatigut tunngavigisarpai.

Akileraartarnermut Aqutsisoqarfiup akileraarutit unerartinneqartut sulisitsisunit tunitsivinnillu tigugaangamigik aningaasat tapiliussanit 6%-iusumeersut 4%-iusumeersullu soraarnerussutisiaqalernissamut aaqqissuussinermut inuup aqqani pilersinneqarsimasumut ingerlateqqittassavai.

Qulaani taaneqartoq Soraarnerussutisiaqalernissamut aaqqissuussinermut peqataasussaatitaaneq pillugu inatsimmi § 7 naapertorlugu pivoq.

Kukkusoqarsimappammi ?


• Soraarnerussutisiaqalernissamut aaqqissuussinermut inatsimmi pineqartumut 2018-imi naammattumik akiliisoqarsimanera innuttaasup uppernarsarsinnaappagu, pineqartup skattekortia/tunisinermi akileraarutinut allagartaa allanngortinneqarsinnaavoq.
• Soraarnerussutisiaqalernissamut aaqqissuussinermut inatsimmi pineqartumut 2018-imi ileqqaarsimasassat matussuserniarlugit aningaasanik, piffissami 20. august 2019-imiit 4. december 2019-imut akiliisoqarsimanera innuttaasup uppernarsarsinnaappagu, pineqartup skattekortia/tunisinermi akileraarutinut allagartaa allanngortinneqarsinnaavoq.

Uppernarsaatit nunatsinni aningaaserivinneersut kiisalu soraarnerussutisiaqalernissamut aaqqissuussivinnit nunatsinneersunit Danmarkimeersunillu uppernarsaatit Akileraartarnermut Aqutsisoqarfiup akuersaarpai. Soorlu pappialat netbankimeersut akuersaarneqarput, aningaasalli soraarnerussutisiaqalernissamut aaqqissuussinermut illit atit atorlugu pilersinneqarsimasumut nuunneqarsimanerat taakkunani erseqqissumik takuneqarsinnaassaaq. Soraarnerussutisiaqalernissamut aaqqissuussineq inuup aqqa atorlugu pilersinneqarsimasoq pappialami netbankimeersumi takuneqarsinnaanngippat, soorlu kontumut suuneranik allassimanngitsumut nuussineq nalinginnaasoq kisimi takuneqarsinnaappat taanna uppernarsaatitut atussallugu akuerineqarsinnaanngilaq.

Suliap Akileraartarnermut Aqutsisoqarfimmi suliareqqinneqartup ukiumi aningaasarsiorfiusumi 2018-imi aningaasarsiat allannguuteqarnerat kingunerippagu, innuttaasullu ileqqaartussaatitaanera taassuma kingunerisaanik allannguuteqarpat, taava innuttaasup skattekortia pissutsit allanngornerat malillugu iluarsineqassaaq.

• Innuttaasoq soraarnerussutisiaqalernissamut aaqqissuussaminut 2019-imi akiliuteqarsimappat, akiliuteqarnerli piffissap 20. august 2019-imiit 4. december 2019-ip avataani pisimalluni, taava akiliutit 2019-imi ileqqaartussaatitaanermik naammassinninniarluni akiliinertut isigineqassapput, innuttaasullu skattekortia/tunisinermi akileraarutinut allagartaa allanngortinneqarsinnaassanani.
• Aammattaaq 2018-imi ileqqaartussaatitaanermi akilersimasassaraluit piffissap qulaani taaneqartup avataani akilerneqarsinnaanngillat. Akilerneqarnissaat Skattekortimut/Tunisinermi akileraarutinut allagartamut tapiliussaq aqqutigalugu pissaaq.

Malugeqquneqarpoq akissarsiortut 2019-imi ileqaagassaat tassaammata ileqqaarnissamut tunngavissap 5%-ii, namminersorlutillu inuussutissarsiummik ingerlataqartut ileqqaagassaat tassaallutik ileqqaarnissamut tunngavissap 3%-ii.

Soraarnerussutisiaqalernissamut aaqqissuussinermut peqataasussaatitaaneq pillugu Inatsisartut inatsisaat nr. 21, 28. november 2016-imeersoq uani atuarneqarsinnaavoq.