Aningaasaqarnermut sulisoqarnermullu aqutsisoqarfimmiit akissarsiat allagartaat tunngavigalugit tapiissutit naatsorsornerinut ilitsersuut

Sulisitsisut assigiinngitsut akissarsianut allagartat assigiinngitsut atortarpaat. Akissarsiat allagartaat taamaattumik sulisitsisumiit sulisitsisumut allanngorarsinnaapput. Ilitsersuut una Aningaasaqarnermut sulisoqarnermullu aqutsisoqarfimmiit akissarsiortup akissarsiaata allagartaanik tunngaveqarpoq.

Tapiissutit aningaasarsiatut A-tut akileraaruteqaataasussaapput. Taamaattumik sulisitsisoq tapiissutinut akileraaruteqaataasussanik unerartitsinissamut pisussaatitaavoq. Taamaattumik soraarnerussutisiaqarnissannut akiliutinnut tapiissutit akileraarutit ilanngaatigineqareerpata aatsaat naatsorsorsinnaavatit.

Tapiissutit akissarsiat allagartaannit toqqaannartumik takusinnaanngilatit. Ilitsersuutip matuma akissarsiat allagartaat aallaavigalugit ilinnut tapiissutit qanoq pisariunngitsumik naatsorsorsinnaaneritit takutippaa.

Aningaasaqarnermut sulisoqarnermullu aqutsisoqarfimmiit akissarsiat allagartaat ataaniittoq takusinnaavat. Akissarsiat allagartaata takutippaa:
1. Akissarsiat (32.673,56 kr.)
2. Tapit soraarnerussutisiaqaataasut (7.162,67 kr.)
3. Nammineq soraarnerussutisiaqarnissamut akiliutit akileraarutit ilanngaatigereerlugit (1.155,25 kr.)
4. Sulisitsisup soraarnerussutisiaqarnissamut akiliutai akileraarutit ilanngaatigereerlugit (2.310,50 kr.)
5. Soraarnerussutisiaqarnissamut peqatigiiffimmut akiliutit (3.639,04 kr.)

Imatut naatsorsuinikkut akissarsiat allagartaanni ilinnut tapiissutit nassaarisinnaavatit. Naatsorsuinerit immikkoortunut sisamanut avinneqarput.

(1) Siullermik akissarsiannit tapiissutiniillu soraarnerussutisiaqarnissamut akiliutit qanoq annertutigineri naatsorsussavatit. Isumaqatigiissutit apeqqutaatillugit taanna allanngorassaaq. Akissarsiat allagartaanni ataaniittumi akissarsiannit tapiissutiniillu soraarnerussutisiaqarnissamut akiliutit 15 %-iupput. Soraarnerussutisiaqarnissamut akiliut nassaariniarlugu siullermik akissarsiat tapisiallu 100-mik agguassavatit (39.836,23 kr./100 = 398,3623 kr.). Tulliullugu 15 %-it pissarsiariniarlugit 15-imik gangerlugu ((39.836,23/100)*15 = 5.975,43 kr.). Inernera tassaavoq 5.975,43 kr.

(2) Maannakkut akileraaruteqartinnak soraarnerussutisiaqarnissamut akiliutit pissarsiaraat. Akileraarutit soraarnerussutisiaqarnissamut akiliutinniit suli ilanngaatigineqanngillat. Naatsorsuinermi tulliuttumi taamaaliussaatit. Akissarsiavit allagartaani akileraarutit procentiat 42 % allassimavoq. Siullermisut soraarnerussutisiaqarnissamut akiliutit 100-mik agguassavat (5.975,43/100 = 59,7543 kr.). Taavalu 42-mik gangerlugu (59,7543 *42 = 2.509,68 kr.). Aningaasat takutippaat soraarnerussutisiaqarnissamut akiliutitit 2.509,68 kr.-inik akileraaruserneqarsimasut. Aningaasat taakku akileraaruteqartinnak soraarnerussutisiaqarnissamut akiliutinniit ilanngaatigissavatit (5.975,43 – 2.509,68 = 3.465,75 kr.). Maannakkut akileraarutit akilereernerisigut soraarnerussutisiaqarnissamut akiliutit takusinnaalerpatit, tassaasut 3.465,75 kr.

(3) Naggataatigut akileraarutit akilereernerisigut soraarnerussutisiaqarnissamut akiliutit akissarsiavit allagartaanni aappaluttumik nalunaaqutsersimasumut aningaasanut assersuutissavatit, taannalu soraarnerussutisiaqarnissamut peqatigiiffimmut akiliutigineqartuni takusinnaavat. Tassani aningaasat takusinnaavat 3.639,04 kr.-iusut. Aatsaannguaq naatsorsukkatsinnit 3.465,75 kr.-init akileraarutit akilinnginnerini soraarnerussutisiaqarnissamut akiliutinit aningaasat erseqqissumik qaffasinnerupput. Tamatumunnga pissutaavoq tapiissutit soraarnerussutisiaqarnissamut peqatigiiffimmut akiliutinut tamarmiusunut ilanngunneqarsimammata. Tapiissut nassaariniarlugu aningaasat taakku marluk ilanngaatigikkit (3.639,04 – 3.465,75 = 173,29 kr.). Akileraarutit akilereernerisigut soraarnerussutisiaqarnissamut akiliutitit soraarnerussutisiaqarnissamut peqatigiiffimmut akiliutigineqartuni aningaasat ilanngaatiginerisigut akissarsiat allagartaanni akileraarutit akilereerlugit ilinnut tapiissutit 173,29 kr.-it maannakkut nassaaraatit.

(4) Akileraarutit akilinnginnerini tapiissutisiatit naatsorsorniarukkit imatut iliussaatit. Akileraarutit akilereernerisigut tapiissutini 173,29 kr.-ini akileraarutit 42 %-it ilanngaatigineqarsimasut nalunngilarput. Tassa imaappoq 173,29 kr.-it tassaapput tapiissutinit 58 %-iusut (100 – 42 = 58). Taava 173,29 kr.-it 58-imik agguarutsigu 1 %-ip qanoq annertutiginera nassaarissavarput. Tapiissutit 100 %-ii gangeruk – imaluunniit akileraarutit akilinnginnerini tapiissutit tamaasa pissarsiariniarlugit taanna maannakkut 100 %-imik ((173,29/58)*100) = 298,77 kr.). Akileraarutit akilinnginneranni tapiissutit taamaalillutik 298,77 kr.-iupput. Tamanna eqqortuunersoq misissorsinnaavarput, tassa tapiissutit soraarnerussutisianut akiliutit 5 %-iannik annertussuseqassasut nalunnginnatsigu. Siusinnerusukkut akileraarutit akilinnginnerini soraarnerussutisiaqarnissamut akiliutit 5.975,43 kr.-inut naatsorsorpavut. Maannakkut akileraarutit akilinnginnerini soraarnerussutisiaqarnissamut akiliutit takusinnaavavut 5 %-ilu naatsorsoraanni taava 298,77 kr.-it pissarsiarissavavut ((5.975,43/100)*5 = 298,77 kr.).

Qulaani naatsorsueriaatsimi Aningaasaqarnermut Sulisoqarnermullu Aqutsisoqarfimmiit akissarsiat allagartaat tunngavigineqarput. Naatsorsueriaaserli pisortanit akissarsiat allagartaanni allani atorneqarsinnaavoq, maluginiarluguli pisortani sulisitsisunit allaniit akissarsiat allagartaanni allassimasut allanik taaguuteqarsinnaammata.