Kalaallit Nunaata avataani soraarnerussutisiassanut akiliuteqarnermi tapiissutit

Ilitsersuut

Kalaallit Nunaata avataani pensionisiassanut akiliuteqarnermi tapiissutisiaqalernissamut qinnuteqarneq

Tunuliaqutaasut

Pensionisiaqartitsivinnut nunani allaniittunut akiliutit akileraaruserneqartarnissaat Inatsisartut akuersissutigaat. Tamatumunnga peqatigitillugu ikaarsaarnermi aaqqissuussisoqarnissaa Inatsisartunit akuersissutigineqarpoq. Massuma aaqqissuussap kingunerissavaa, aalajangersimasut pissutaallutik inuit ukiorpaalunni tapiissutisiaqarsinnaassasut. Pensionisiaqartitsivinnut nunani allaniittunut akileraarusersuisarneq uani paasisaqarfiginerusinnaavat.

Namminersorlutik Oqartussat pensionisianut Aningaasarsianit akileraarutit pillugit Inatsisartut inatsisaanni nr. 12, 2. november 2006-imeersumi § 39 a, imm. 1-imi imm. 2-milu piumasaqaatinik naammassinnittunut akiliuteqarnermi piffissami 2017-2021-mi tapiissuteqartassaaq.

Tapiissutit pillugit aaqqissuussamut apeqqutit akissutillu tullinnguuttuni atuakkit.


Kikkut tapiissutisiaqarsinnaappat?

Tapiissutit taamaallaat inunnut makkununnga tunniunneqartarput:

  • ulloq 31. december 2016 Kalaallit Nunaannut tamakkiisumik akileraartussaatitaasunut,
  • qinnuteqarnerup nalaani aamma/imaluunniit tunniussinerup nalaani kipiffeqanngitsumik suli tamakkiisumik Kalaallit Nunaannut akileraartussaatitaasunut,
  • soraarnerussutisiaqarnissamut inuunermullu sillimmatinut soraarnerussutisiaqalernissamut aningaasaateqarfimmi imaluunniit inuunermut soraarnerussutisiaqalernissamullu sillimmasiisarfimmi Kalaallit Nunaata avataani pilersinneqarsimasunut 2016-imi akiliuteqarsimasunut, aamma
  • 2016-imi akiliutigisimasanut tunngatillugit ilanngaateqarsinnaatitaasimasunut imaluunniit akileraaruteqaatasussanik nalunaarsuinermi ilannguneqartussaanngitsunut ilaatinneqartunut.

 

Tapiissutisiaqalertoqassappat piumasaqaatit siuliani allassimasut tamarmik naammassineqarsimasariaqarput.

 

Kikkut tamarmik qinnuteqassappat?

 

Namminersorlutik Oqartussani suliffeqarfiutaannilu kiisalu kommunini sulisunut tapiissutit sulisut aningaasarsineranni tunniunneqartarput. Taamaammat sulisut taakku Akileraartarnermut Aqutsisoqarfimmut tapiissutisiaqalernissamut qinnuteqassanngillat.  Sulititsisuni siuliani taaneqartuni sulisuuguit tapiissutisiaqalernissaq pillugit sulititsisut saaffigissavat.

 

Namminersorlutik Oqartussani suliffeqarfiutaannilu kiisalu kommunini sulisuunngitsut Akileraartarnermut Aqutsisoqarfimmut tapiissutisiaqalernissamut qinnuteqarsinnaapput.

 

Qaqugukkut qinnuteqarsinnaavunga?

 

Ukiumut ataasiaannarlutit ukiumut qaangiuttumut tapiiffigineqarnissamik qinnuteqarsinnaavutit.

Tapiissutit pillugit aaqqissuussap ingerlanerani ukiut tamaasa ullut qinnuteqarfiusinnaasut tassaapput 1. juuli - 30. septembari.

 

Assersuut:

2017-imut tapiissutit piffissami 1. juuli – 30. septembari 2018-imi qinnutigineqassapput.

 

Tapiissut qanoq qinnutigineqassava?

Qinnuteqaat taamaallaat qarasaasiatigut tunniunneqassaaq. Allakkatigut qinnuteqartoqarsinnaanngilaq.

Qarasaasiatigut periarfissat makku toqqarsinnaavatit:

 

Akileraarutikka

Qarasaasiaq atorlugu www.sullissivik.gl.-imi Akileraarutikka aqqutigalugu sukkasuumik ajornanngitsumillu qinnuteqarsinnaavutit.

 

Akileraarutikka´p ataani, toqqagassat talerperlermiittuni qinigassani toqqassavat: ”Nunani allani pensionisiaqartitsivinnut tapiissutit”. Paasissutissat sulititsisuit nalunaarutigisimasai immersugassani immersoreersimassapput. Nammineq akiliutigisimasatit pillugit immersugassani paasissutissat kisiisa immersorsinnaavatit.

 

Uppernarsaammik ilanngussissaatit. Uppernarsaatit pillugit paasissutissat ataani atuakkit.

 

Akileraarutikka-mut iserasuarnissamut NemID pisariaqarpoq. NemID pillugu videot ilitsersuutit uani takukkit: https://www.sullissivik.gl/Emner/NemID

 

E-mail

Qinnuteqarnissamut immersugassaq atorlugu tapisiaqarnissamik qinnuteqarsinnaavutit.  Qinnuteqaat uppernarsaatillu e-mailikkut kakkiunneqassapput pension@nanoq gl.-mullu nassiunneqarlutik.

 

Qinnuteqarnermi uppernarsaatit suut ilanngunneqassappat?

Ulloq 31/12-2016-imi soraarnerussutisiaqarnissamut ileqqaagaqarnermut uppernarsaat ilanngutissavat.
Taassuma saniatigut nammineq soraarnerussutisiaqarnissamut akiliutigisimasavit uppernarsaataat ilanngutissavatit.
Uppernarsaatigisinnaavatit soraarnerussutisiaqarnissamut akiliuteqartarsimanernut takussutissiaq kiisalu bankimit kontomut akiliuteqartarsimanermut takussutissiaq.

 

 

Tapiissutisiarisinnaasakka qanoq amerlatigippat?

 

Tapiissutit tapiissutisiaqarsinnaatitaasup soraarnerussutisiaqarnissamut akiliutaanit procentinngorlugit naatsorsorneqartarput. Tapiissutit annertussusaat:

 

Ukioq:

2017 

2018

2019

2020  

2021

Tapiissutigineqartut:

5 %

5 %

5 %

3 %

3 %

 

Piffissami 2017-2019-imi tapiissutit qaammammut annerpaamik 420 kr.-usinnaapput piffissamilu 2020-2021-mi qaammammut 250 kr.-usinnaallutik.

 

Tapiissut akileraarutigineqassava?

Tapiissutit isertitatut A-tut akileraaruserneqartussatut isigineqarput.

 

 

Tapiissutit qanoq akileraaruserneqassappat?

Qinnuteqaatit Akileraartarnermut Aqutsisoqarfimmit akuerineqarpat, Akileraartarnermut Aqutsisoqarfiup tapiissutinit A-tut akileraaruserneqartussat tigummiinnassavai. Taamaammat tapiissutit akileraareernerup kingorna ilanngariikkatut akilerneqartassapput.

 

Namminersorlutik Oqartussani suliffeqarfiutaannilu kiisalu kommunini sulisuunerit pissutigalugu sulititsisunnit tapisiaqartinneqarsimaguit sulititsisuit tapiissutinit A-tut akileraaruserneqartussat  tunngaviatigut tigummiinnartussaavai.

 

Tapiissutit nammineerluni nalunaarsuiffimmi allassimanissaat illit qulakkiissavat.

 

Tapiissutit qanoq tunniunneqartarpat?

Kontonormut Akileraartarnermut Aqutsisoqarfiup aallaaviusumik paasissutissaataanut nalunaarutigereersimagukku, tapiissutisiassatit kontomut tassunga nakkartinneqassapput.

 

Kontonormut suli nalunaarutigisimanngikkukku www.sullissivik.gl-imi Akileraarutikka-mi ajornanngitsumik nalunaarutigisinnaavat. Iserasuaruit ”aallaaviusumik paasissutissat” talerperlermiittoq toqqaannassavat.

 

Qinnuteqarnissamut immersugassaq kakkiussaq atorniarukku kontot pillugu paasissutissat ilanngullugit immersuutissavatit.