Soraarnerussutisiaqarnissaq siunertaralugu aaqqissuussinerit akileraartarnikkut suliarineqartarnerat pillugu Akileraartarnermi Pisortaqarfiup kaajallaasitaa nr. 1, 1. december 1996-imeersoq

Soraarnerussutisiaqarnissaq siunertaralugu aaqqissuussinerit akileraartarnikkut suliarineqartarnerat pillugu Akileraartarnermi Pisortaqarfiup kaajallaasitaa nr. 1, 1. december 1996-imeersoq.


Aallaqqaasiutaasumik oqaaseqaatit.




Soraarnerussutisiaqarnissaq siunertaralugu aaqqissuussinerit akileraartarnikkut suliarineqartarnerat aningaasarsianit akileraarutit pillugit Inatsisartut inatsisaatigut nr. 2-kkut 12. juni 1995-imeersukkut aamma nr. 2-kkut 2. maj 1996-imeersukkut kingullermik allannguuteqartinneqarpoq.


Malittarisassat taakku aningaasarsianit akileraarutit pillugit Inatsisartut inatsisaanni §§ 17b - 17d-mi massakkut katersorneqarsimapput, taamatuttaarlu paasissutissiinissaaq pillugu aalajangersakkat §§ 88-imillutillu 97-imiillutik.


Soraarnerussutisiaqarnissaq siunertaralugu aaqqissuussinerit akileraartarnikkut suliarineqartarnerat pillugu inatsisip allannguutai makkuninnga imaqarput:


A. Soraarnerussutisiaqarnissaq siunertaralugu aaqqissuussinerit akileraarutitaqanngitsumik atorunnaarsinneqarsinnaasut akileraarutitigullu ilanngaatigineqarsinnaasut pilersinneqarnissaannut periarfissat peerneqarnissaat. Matumani soraarnerussutisiaqarnissaq siunertaralugu aaqqissuussinerit danskit soraarnerussutisianik akileraarusersuinerat pillugu inatsimmi § 53A nuukkumaneqartut pineqarput.


B. Soraarnerussutisiaqarnissaq siunertaralugu aaqqissuussinerit akileraarusersorneqarnerat pillugu malittarisassat nutarterneqarnissaat paasiuminarnerulersinneqarnissaallu, taamaalillutik malittarisassat inatsisit oqqasertaasigut ersarissumik allassimalersillugit.


C. Inuunermut sillimmasiissutinik taaneqartartut iluanaarutitaasa akileraarusersorneqalernissaat. Aaqqissuussinerit taakku iluanaarutitaat siunissami akileraaruteqaataasussanngussapput.


D. Akileeqataassutit akiliutissallu sulisitsisup sulisumi soraarnerussutisiaqarnissaanut akiliutigisartagai akileraaruteqaatasussanik nalunaarsuinermi ilannguneqartussaanngitsut (bortseelsesret) pillugit nalunaaruteqartussaatitaanermik eqqussiniarneq.


Taamaalilluni soraarnerussutisiaqarnissaq siunertaralugu aaqqissuussinerit assigiinngitsut pingasut akileraartarneq eqqarsaatigalugu pigineqalerput:


1. Soraarnerussutisiaqarnissaq siunertaralugu aaqqissuussinerit ilanngaatigineqarsinnaasut ingerlaavartumik tunniussiviusartut, § 17b aamma c malillugit aaqqissuussinerit.


2. Soraarnerussutisiaqarnissaq siunertaralugu aaqqissuussinerit ilanngaatigineqarsinnaanngitsut, iluanaarutitaat ingerlaavartumik akileraarusersorneqartut, § 17d malillugu aaqqissuussinerit.


3. Soraarnerussutisiaqarnissaq siunertaralugu aaqqissuussinerit ilanngaatigineqarsinnaanngitsut, iluanaarutitaat ingerlaavartumik akileraarusersugaanngitsut, § 17d, imm. 3, 5 aamma 6 malillugit aaqqissuussinerit.


Kaajallaasitaq immikkoortunik makkuninnga imaqarpoq:




Immikkoortoq 1.


Kap. 1. Soraarnerussutisiaqarnissaq siunertaralugu aaqqissuussinerit taaguutaat (imm. 1-7).


Kap. 2. Soraarnerussutisiaqarnissaq siunertaralugu aaqqissuussinerit ingerlaavartumik tunniussiviusartut, akileeqataassutitaat akiliutitaalluunniit ilanngaatigineqarsinnaasut


(imm. 8-13).


Kap. 3. Soraarnerussutisiaqarnissamik siunertamut akerliusumik iliuuseqartoqartillugu akileraarusersuisarneq, matumani piffissaq suli nallinngitsoq atorunnaarsitsineq ilanngullugu


(imm. 14-15).


Kap. 4. Inatsimmi §§ 17b-mi aamma 17c-mi ilanngaateqartarneq pillugu malittarisassat


(imm. 16-24).


Kap. 5. Sulisitsisup sulisumi pensionisiaqalernissaanut akileeqataassutai aningaasarsianik nalunaaruteqarnermi ilanngunneqartussaanngitsut (bortseelsesret)


(imm. 25-28).


Kap. 6. Ataatsimoortumik inuunermik sillimmasiisimasunut ataasiaannartumillu tunniunneqartartut


(imm. 29-33).


Immikkoortoq 2.


Kap. 7. Aaqqissuussinerit ilaanngaatigineqarsinnanngitsut, iluanaarutitaat ingerlaavartumik akileraarusersorneqartut


(imm. 34-39).


Kap. 8. Aaqqissuussinerit ilanngaatigineqarsinnaanngitsut, iluanaarutitaat ingerlaavartumik akileraarusersugaanngitsut


(imm. 40-42).


Kap. 9. Paasissutissiisussaatitaaneq


(imm. 43-44).


Kap. 10 Ikaarsaariarnermi malittarisassat


(imm. 45-47).



IMMIKKOORTOQ 1




Kapitali 1


Soraarnerussutisiaqarnissaq siunertaralugu aaqqissuussinernut


ingerlaavartumik tunniussiviusartunut aaqqissuussinerit makku ilaapput:


Tjenestemandit soraarnerussutisiaat.


1. Tassani soraarnerussutisiaqarnissaq siunertaralugu aaqqissuussinerit pineqarput, taakkunani naalagaaffik, Namminersornerullutik Oqartussat imaluunniit kommune soraarnerussutisianik ingerlaavartunik inuuneq naallugu tunniunneqartartunik tunniussisuusarlutik, siusinnerusukkut naalagaaffimmi, Namminersornerullutik Oqartussani, meeqqat atuarfianni, ilagiinni imaluunniit kommunimi atorfeqarsimanerup kingunerisaanik, tak. § 17c, imm. 1.


Pensionit tunniunneqartartut (utoqqalineq pissutigalugu soraarnerussutisiat, aappaasumut toqukkut qimataasimasumut aamma meeqqanut pisartagaritinneqartartut) pensionisiaqarsinnaatitaasup ukiuni tunniussiviusartuni aningaasarsiaanut akileraaruteqaataasussanut ilanngullugit naatsorsuunneqassapput, tak. § 17c, imm. 2.


Suliffeqarnermi ilassutitut soraarnerussutisiat (ATP).


2. ATP atorlugu aaqqissuussineq 67-inik ukioqalernit ingerlaavartumik inuuneq naallugu tunniunneqartartunik pisinnaatitsiviuvoq. Aaqqissuussineq taanna § 17c, imm. 1-imi pineqartunut ilaatinneqarpoq. Sulisitsisoq sulisorlu tamarmik aaqqissuussinermut tassunga akilersueqataasussaatitaapput. Sulisoq 1/3-imik sulisitsisorlu 2/3-imik akileeqataassuteqartarput.


ATP-mut akileeqataassutit akissarsiallip aningaasarsiaasa akileraaruteqaataasussat naatsorsorneqarneranni ilanngunneqassanngillat. Tamanna sulisitsisumut sulisumullu atuuppoq.


Soraarnerussutisiatut tunniunneqartartut ukiuni tunniussiviusartuni soraarnerussutisiaqarsinnaatitaasup aningaasarsiaasa akileraaruteqaataasussat naatsorsorneqarneranni ilaanngullugit naatsorsuunneqassapput, tak. § 17c, imm. 2.


Soraarnerussutisiaqarnissamut aningaasaateqarfitsigut aaqqissuussinerit.


3. Suliffinni namminersortuni sulisunut aamma pisortani isumaqatigiissutit tunngavigalugit atorfeqartunut atorfinitsitaanermut ilagitillugu soraarnerussutisiaqalernissaq siunertaralugu aaqqissuussinerit pilersinneqarsinnaapput soraarnerussutisiaqarnissamut aningaasaateqarfimmi ilaasortaaneq aqqutigalugu. Aaqqissuussinerit taakku § 17b-mi pineqartunut ilaatinneqassapput soraarnerussutisiaqarnissamut aningaasaateqarfiit pineqartut Naalakkersuisunit akuerisaappata imaluunniit sillimmasiisarneq pillugu inatsimmi pineqartunut ilaatinneqarunik.


Soraarnerussutisiaqarnissamut aningaasaateqarfitsigut aaqqissuussinerit pilersinneqarsinnaanngillat pisussaaffik erseqqissarneqarsimatinnagu, tassa imaappoq sulisitsisup akileeqataassutit soraarnerussutisiaqarnissamut aningaasaateqarfimmut ingerlaavartumik akilersussagai, soraarnerussutisiaqartitsinissamik pisussaaffiup eqqortinneqarnissaa siunertaralugu - tassanilu sulisitsisup sulisullu akileeqataassutaat eqqarsaatigalugit - taamaalillunilu aningaasat taakku sulisitsisumit attorneqarsinnaajunnaassallutik.


Soraarnerussutisiatut tunniunneqartartut ukiuni tunniussiviusartuni soraarnerussutisiaqarsinnaatitaasup aningaasarsiaasa akileraaruteqaataasussat naatsorsorneqarneranni ilanngullugit naatsorsuunneqassapput, tak. § 17b, imm. 6.


Sillimasiisarnermik aaqqissuussinerit.


4. Sillimmasiisarnermik aaqqissuussinerit atorfinitsitaanermut atatillugu (sulisitsisutigut aaqqissuussinerit) aamma atorfinitsitaanerup avataatigut (aaqqissuussinerit nammineerluni pilersinneqartut) pilersinneqarsinnaapput. Sillimmasiisarfiit Naalakkersuisunit akuerisaasut imalunniit Finanstilsynemit akuersissummik peqarlutik Danmarkimi sillimmasiisarnermik ingerlatsisut aqqutigalugit sillimmasiisoqarsinnaavoq. Sillimmasiineq atorfinitsitaanermut ilaatillugu pisimappat atorfinitsinneqartoq sillimasiinermik piginnittuussaaq, sillimmasiinerlu atorfinitsinneqartup inuuneranut atatillugu pilersinneqassalluni.


Soraarnerussutisiatut tunniunneqartartut ukiuni tunniussiviusartuni soraarnerussutisiaqarsinnaatitaasup aningaasarsiaasa akileraaruteqaataasussat naatsorsorneqarnerannut ilanngullugit naatsorsuunneqassapput, § 17b, imm. 6.


Livrentit.


5. Livrentikkut anguniarneqartoq tassaavoq sillimmasertup aalajangersimasumik ukioqalernerminiit toqunissami tungaanut ingerlaavartumik ukiumoortumik isertitaqartinneqartarnissaata qulakkeerneqarnissaa. Livrente atorlugu sillimasiinermi sillimmasertoq 60-inik ukioqalertinnagu pisartagaqartitsisoqarsinnaanngilaq, tunniunneqartartullu sillimmasertup toquneratigut unitsinneqartussaallutik.


Soraarnerussutisiatut tunniunneqartartut ukiuni tunniussiviusartuni soraarnerussutisiaqarsinnaatitaasup aningaasarsiaasa akileraaruteqaataasussat naatsorsorneqarnerannut ilanngullugit naatsorsuunneqassapput, § 17b, imm. 6.


Innarluuteqarneq/iloqianngorneq pissutigalugu soraarnerussutisiat.


6. Innarluuteqarneq/iloqianngorneq pissutigalugu tunniunneqartartutigut anguniarneqartoq tassaavoq sillimmasersimasup innarluuteqalernerminit/iloqianngornerminit innaarluuteqarunnaarnissami toqunissamiluunniit tungaanut ukiumoortumik ingerlaavartumik isertitaqartarnissaata qulakkeerneqarnissaa.


Sillimmasiisarfiit nammineq aalajangissavaat qanoq annertutigisumik innarluuteqalernermi/iloqianngornermi pisartakkat tunniunneqartalissanersut. Inuussutissarsiorsinnaajunnaarsinnaanermut sillimmaserneq innarluuteqalersinnaanermut/iloqianngornermut sillimmasiisarnermut naligitinneqarpoq.


Soraarnerussutisiatut tunniunneqartartut ukiuni tunniussiviusartuni soraarnerussutisiaqarsinnaatitaasup aningaasarsiaasa akileraaruteqaataasussat naatsorsorneqarnerannut ilanngullugit naatsorsuunneqassapput, § 17b, imm. 6.


Sillimasiinerit akuleriissillugit.


7. Sillimmasiinerit akuleriissinneqarpata, assersuutigalugu ajoqusersinnaanermut sillimasiinerup saniatigut innarluuteqalersinnaanermut/iloqianngorsinnaanermut sillimmasertoqarsimappat innarluuteqalersinnaanermut/iloqianngorsinnaanermut sillimmasiinermut akiliutit ilanngaatigineqarsinnaasussaapput.


§ 97, imm. 2 malillugu sillimaasiisarfiup sillimasernermut uppernarsaammi nalunaassavaa sillimmasiinernut assigiinngitsunut marlunnut taakkununnga akiliutit qanoq agguataarsimanersut.


Paasissutissiisussaatitaaneq sillimmasiisarfiup Kalaallit Nunaata avataaniittup nammineq piumassutsini malillugu eqqortinngippagu akileraarusiisartutut oqartussaasut nammineq naliliinermikkut akiliutit qanoq agguataarneqarnissaat aalajangissavaat.


Kapitali 2


Soraarnerussutisiaqarnissaq siunertaralugu aaqqissuussinerit


ingerlaavartumik tunniussiviusartut - § 17b aamma c


malillugit aaqqissuussinerit.


8. Soraarnerussutisiaqarnissaq siunertaralugu aaqqissuussineq ingerlaavartumik tunniussiviusartoq tassaatinneqarpoq aaqqissuussineq inuuneq naallugu pisartagaqarnissamut pisinnaatitsisoq, pisartakkallu pisartagaqartup toquneratigut unitsinneqartussaallutik.


Taamaattorli atorfinitsitaanermut atatillugu soraarnerussutisiaqarnissaq siunertaralugu aaqqissuussineq inuuneq naallugu tunniunneqartartussanik 6.000 kr.-t sinnernagit aningaasartalik pineqarpat tunniunneqartussat ataasiaannartumik tunniunneqarsinnaapput, tak. § 17b, imm. 3.


Soraarnerussutisiaqarnissaq siunertaralugu aaqqissuussineq soraarnerussutisiaqarnissamut aningaasaateqarfimmi Kalaallit Nunaanni angerlarsimaffeqartumi, atorfinitsitaanermullu atatillugu pilersinneqarsimasoq pineqarpat aningaasat soraarnerussutisiaqarnissaq siunertaralugu aaqqissuussinermit ingerlaavartumik ukiuni marlunni tunniunneqartartut amerlaqataat ataasiaannartumik tunniunneqarsinnaapput, tak. § 17b, imm. 3a.


Aaqqissuussineq tassaassaaq utoqqalineq pissutigalugu soraarnerussutisianik tunniussisarneq, siusinnerpaamik 60-inik ukioqalernermi aallartissinnaasoq, Skatterådi ukiut killissaannik appasinnerusumik akuersissuteqarsimanngippat. Tamatuma saniatigut aaqqissuussineq taanna aappamut toqukkut qimagaasumut meeqqanullu pisartakkanik kiisalu innarluuteqalernermi/iloqianngornermi soraarnerussutisianik imaqartinneqarsinnaavoq.


9. Utoqqalineq pissutigalugu soraarnerussutiat inuunermik piumasaqaateqarfiullutillu inuuneq naallugu atuutissaapput. Aaqqissuussinerup inuunermik piumasaqaateqarfiunera imaappoq sillimmasersimasup toqunerata kingorna aaqqissuussineq malillugu pisartakkanik tunniussisoqarsinnaassanngitsoq. Aaqqissuussinerup inuuneq naallugu atuunnissaa imaappoq sillimmasersimasoq uumajuarallartillugu tunniussisarneq ingerlaannassasoq. Tassa imaappoq tunniussisarneq piffissami siumut aalajangersariikkami unitsinneqarsinnaanngitsoq, ukiulluunniit qassiussusissaat siumut aalajangersaareersimasut qaangiunneranni unitsinneqarsinnaanani.


10. Utoqqalineq pissutigalugu soraarnerussutisiat inuuneq naallugu pisartagarineqartussatut isigineqartarput, inuuneq naallugu atuuttussamit aamma ilassutissamit katitigaagaluaruniluunniit (knæk-ordning). Assersuutigalugu tunniussisarnerup nalaani allannguuteqartoqarsinnaavoq pisartagaqartup soraarnerussutisianik allanik pisinnaatitaalerneratigut, assersuutigalugu isumaginninnikkut pensionisianik. Taamaattorli utoqqalineq pissutigalugu soraarnerussutisianut tunngasut tunniunneqartarunnaartut utoqqalineq pissutigalugu soraarnerussutisiat inuuneq naallugu tunniunneqartartut 50%-iinik amerlanerpaaffeqassallutik.


Assersuut:


Soraarnerussutisiaqarnissaq siunertaralugu aaqqissuussineq inuuneq naallugu qaammammut 11.000 kr.-nik pisartagaqarfiusoq pilersinneqarpat atorunnaartortaat ilassutaasimasut amerlanerpaamik 5.500 kr.-iusinnaapput.


11. Aappaasumut toqukkut qimataasumut meeqqanullu pisartagaritinneqartartut siunertaat tassaavoq sillimmasersimasup aaappaata meeraasalu (matumani aappaasup nammineq meerai ilanngullugit eqqarsaatigalugit) sillimmasersimasup toqunerata kingorna ingerlaavartumik isertitaqartarnissaasa qulakkeerneqarnissaat.


Innarluuteqarnermi/iloqianngornermi soraarnerussutisiat siunertaat tassaavoq sillimmasersimasup sulisinnaajunnaarnerminiit utoqqalinini pissutigalugu soraarnerussutisiaqalernissami tungaanut ingerlaavartumik isertitaqartarnissaata qulakkeerneqarnissaa.


Tassa aappaasup toqukkut qimataasup meeqqallu pisartagaat aamma innarluuteqalernermi/iloqianngornermi pisartakkat inuuneq naallugu pisartagaasussaanngillat. Aappaasup toqukkut qimagaasup pisartagai sivikinnerpaamik ukiuni qulini tunniunneqartartussaapput, meeqqallu pisartagaat taassuma 24-nik ukioqalernissaata tungaanut sivisunerpaamik tunniunneqartarsinnaallutik. Piffissap pisartakkanik taakkuninnga tunniussiviusartup ingerlanerani allanngortitsilluni aaqqissuussisoqarsinnaanngilaq.


12. Pineqartoq sillimmasersimasuussaaq, sillimmasiinermillu piginnittuussaalluni. Sillimmasernermut piginnittuunngitsoq sillimmasertulluunniit sulisitsisua akiliutissanik akileeqataassutissanilluunniit akiliisarpat akiliutigineqartarsimasut sillimmasernermik piginnittup aningaasarsiaanut akileraaruteqaataasussanut ilanngullugit naatsorsuutigineqartassapput, tak. imm. 25 aamma 26.


13. Imm. 8-12-imi piumasaaqaatit taaneqartut tamarmik eqqortinneqarsimassapput aaqqissuussinermut akiliutit akileeqataassutillu ilanngaatigineqarsinnaassappata. Piumasaqaataasut ilaat ataasiinnarluunniit eqqortinneqarsimanngippat ilanngaateqartitsinissaq akuerineqarsinnaanngilaq, taamaattorli tak. imm. 7, 32, aamma 33.


Soraarnerussutisiaqarnissamut inuunermillu sillimmasiinermut akiliutit akileeqataassutillu akilerneqarsimasut soraarnerussutisianik akileraarusersuineq pillugu inatsimmi §§ 50-imi aamma 53A-mi pineqartunut ilaatinneqartut ilanngaatigineqarsinnaanngillat, taamaattorli tak. ikaarsaariarnermi malittarisassat pillugit imm. 45-47.


Kapitali 3


Soraarnerussutisiaqarnissamik siunertamut akerliusumik iliuuse-


qartoqartillugu akileraarusersuisarneq, matumani piffissaq


suli nallinngitsoq atorunnaarsitsineq ilanngullugu.


Soraarnerussutisiaqarnissamik siunertamut akerliusumik iliuuseqartoqartillugu akileraarusersuineq.


14. Sillimmasersimasoq soraarnerussutisiaqarnissamik siunertamut akerliusumik iliuuseqarpat akileraarusersuisoqassaaq, taamatummi iliuuseqarnerit aningaasanik tunniussinertut isigineqartarmata, tak. § 17b, imm. 6, oqaaseqatigiit aappaat. Iliuuseqarnerit akileraarusersuinermik kinguneqartut tassaapput tunniussinerit imaluunniit pigisassanngortitsilluni qularnaveeqqusiussilluniluunniit tunniussinerit allat kiisalu iliuutsit allat soraarnerussutisiaqarnissaq siunertaralugu aaqqissuussinerup ilanngaatigineqarsinnaaneranut pisinnaatitaaffeqassagaanni piumasaqaataasunik eqqortitsiunnaartut, tak. imm. 8-12.


Aningaasat aningaasarsianut akileraaruteqaataasussanut ilanngullugit naatsorsuunneqartussat tassaapput aningaasat iliuuseqarnerup nalaani aaqqissuussineq atorunnaarsinneqartuuppat tunniunneqarsimasinnaagaluartut, imaluunniit fripolicep taassumaluunniit assigisaasa aningaasanngorlugit nalingat, tak. § 17b, imm. 6, oqaaseqatigiit aappaat.


Fripolice tassaavoq sillimmasernermut uppernarsaatip allagartaa akiliutitaqanngitsoq, inuunermut sillimmasertup sillimmasiinermut akiliuteqartarunnaarnermigut akiliutigisarsimasani tunngavigalugit tunniuteqqusinnaasaa.


Piffissaq suli nallinngitsoq atorunnaarsitsinermi akileraarusersuineq.


15. § 17b imaluunniit § 17c tunngavigalugu aaaqqissuussineq piffissaq suli nallinngitsoq atorunnaarsinneqarpat atorunnaarsitsinerup nalaani pisiarinneqqinnermi aaqqissuussinerup nalingi Kalaallit Nunaanni akileraarusersorneqassanngillat, tak. akileraartarnermut inatsimmi § 17c, imm. 5, tassami aaqqissuussineq taanna danskit akileraarutaannik aamma/imaluunniit akitsuutaannik akileraaruserneqassammat/akitsuuserneqassammat.


Kapitali 4


§§ 17b-mi aamma 17c-mi ilanngaateqartarneq pillugu malittarisassat.




16. Soraarnerussutisiaqarnissamik aaqqissuussinernut akileeqataassutit akiliutillu § 17b-mi aamma § 17c, imm. 1-imi pineqartunut ilaatinneqartut aningaasarsiat akileraaruteqaataasussat naatsorsorneqarneranni ilanngaatigineqarsinnaapput. Taamaattorli ilanngaatiginnissinnaatitaaneq atuutissanngilaq akiliutissat taakku pineqartup sulisitsisuanit akilerneqarsimappata, tassami § 17b, imm. 5 aamma § 17c, imm. 1 malillugu sulisitsisup akiliutai sulisup aningaasarsiaanut akileraaruteqaataasussanut ilaatinneqartussaanngimmata (bortseelsesret), tak. imm. 25.


Ilanngaateqarsinnaatitaaneq taamaallaat inunnut nunamut maanga tamakkiisumik akileraartussaatitaasunut atuuppoq.


17. Soraarnerussutisiaqarnissamik aaqqissuussinernut akileeqataassutit akiliutillu § 17b-mi aamma § 17c, imm. 1-imi pineqartunut ilaatinneqartut malittarisassatut pingaarnertut ukiumi aningaasarsiorfiusumi akilerneqarfigisimasassaminni ilanngaatigineqarsinnaapput. Piffissaq akiliuteqarfiusoq ukiumit aningaasarsiorfiusumit sivisuneruppat akiliutit akileeqataassutilluunniit piffissamut akiliuteqarfiusumut attuumassuteqarfigisaminnut agguataarneqassapput. Piffissaq akiliuteqarfiusoq tassaavoq piffissaq aaqqissuussinerup pilersinneqarneranit atuutilernissaata tungaanut ingerlasoq. Piffissaq akiliuteqarfiusoq sillimmasiinermut uppernarsaammi (police) allassimassaaq.



Assersuut:


Soraarnerussutisiaqarnissamut aaqqissuussineq 1. december 1995-imi ataasiaannartumik 200.000 kr.-inik akiliuteqarluni pisimappat, soraarnerussutisianillu tunniussisarneq 1. december 2015-imi aallartissappat soraarnerussutisiaqarsinnaatitaasup ukiumi aningaasarsiorfiusumi 1995-imi aningaasarsiaminik akileraaruteqaataasussanik naatsorsuinermini 200.000 kr.-t 1/240-ii, tassalu 833 kr.-t ilanngaatigisinnaassavai, ukiunilu aningaasarsiorfiusuni tulliuttuni 19-ini 200.000 kr.-t 12/240-ii, tassalu 10.000 kr.-t kiisalu ukiumi aningaasarsiorfiusumi 2015-imi 11/240-t tassalu 9.167 kr.-t ilanngaatigisinnaassallugit.


Akileraartussaatitaaneq 30. juni 1997-imi atorunnaarpat ilanngaateqarsinnaatitaaneq tamatumunnga peqatigitillugu atorunnaassaaq. Ukiumut aningaasarsiorfiusumut 1997-imut aningaasarsiat akileraaruteqaataasussat naatsorsorneqarneranni 200.000 kr.-t 6/240-ii, tassalu 5.000 kr.-t ilanngaatigineqarsinnaassapput.


18. Soraarnerussutisiaqarnissamik aaqqissuussinernut ilanngaatigineqarsinnaatitaasunut akileeqataassutit akiliutillu akilerneqarsimasut ilanngaatigineqartut akileraartussaatitaasup sulinermigut akissarsiaasa tamarmiusut 15%-iinit amerlanerussanngillat. Nunamut maanga akileraartussaatitaaneq ukiup aningaasarsiorfiusup ingerlanerani atulersimappat atorunnaarsimappalluunniit ilanngaatigineqartut ukiumi aningaasarsiorfiusumi tassani akileraartussaatitaanerup ingerlanerani akissarsiatigut isertitat 15%-iinit amerlanerusinnaanngillat.


ATP-mut aamma tjenestemandit soraarnerussutisiaannut akileeqataassutit ilanngaatit amerlassusiisa qummut killilerneqarsimanerannut ilaatinneqanngillat.


19. Aappariit ataatsimut akileraartinneqartut ilanngaatit taakku amerlanerpaaffissaminni 15%-iusut akunnerminni nammineq agguataarsinnaavaat, taamaalillutik marluullutik tamarmik immikkut utoqqalineq pissutigalugu soraarnerussutisiaqarnissamik ilanngaatigineqarsinnaasunik aaqqiissuteqarsinnaallutik, naak aappaa kisimi isertitaqartaraluartoq (akissarsiatigut isertitat imaluunniit namminersornerluni inuussutissarsiummik ingerlatsinikkut isertitat), imaluunniit aappaannaa utoqqalineq pissutigalugu soraarnerussutisiaqarnissamik ilanngaatigineqarsinnaasumik aaqqiissuteqarsinnaalluni.


20. Akissarsiatigut isertitat tamarmiusut tassaatinneqarput pineqartup sulisitsisuminit pissarsiarisimasai tamaasa, isertitat A-unersut B-unersulluunniit apeqqutaatinnagu. Taamaalillutik akeqanngitsumik ineqartitaanerup, nerisaqartitaanerup, biileqartitaanerup, telefoneqartitaanerup il.il. nalingi naatsorsuinermi tunngaviusumi ilaatinneqassapput. Akiliunneqarluni feriarnerit nalingi akileraarusersorneqarunik aatsaat naatsorsuinermi tunngaviusumut ilanngunneqassapput.


Sulisitsisup sulisumi pensionisiaqalernissaanut akileeqataassutai aningaasarsianik nalunaaruteqarnermi ilanngunneqartussaanngitsunik aaqqissuussineq pineqarpat, tak. imm. 25, sulisitsisup sulisullu soraarnerussutisiaqarnissamut akileeqataassutaat tamarmik naatsorsuinermi tunngavissamut ilanngunneqassapput.


Tunniunneqartartut § 24 tunngavigalugu akileraaruteqaataasussaanngitsut, assersuutigalugu ullormusiat angalanersiutillu, naatsorsuinermi tunngavissamut ilanngunneqassanngillat. Tamanna inuiaqatigiit suliassarititaannik suliaqarnikkut isertitanut aamma atuuppoq, tassami isertitat taakku atorfinitsitaanermut atatillugu pissarsiarineqarsimasutut isigineqanngimmata.


Assersuut:


Utoqqalineq pissutigalugu soraarnerussutisiaqarnissamik aaqqissuussineq assersuutigalugu 1. juli 1995-imiit atuutilersussaq pilersinneqarpat, qaammammut 15.000 kr.-nik akiliuteqarfigineqartartumik, taava akileraartartoq qaammammut katillugit 30.000 kr.-nik akissarsialik (ajunngitsorsiassat assigiinngitsut tamaasa ilanngullugit) ukiumi aningaasarsiorfiusuni 1995-imi 180.000 kr.-t 15 %-ii, tassalu 27.000 kr.-t 1996-imilu 360.000 kr.-t 15%-ii, tassalu 54.000 kr.-t ilanngaatigisinnaassavai.


21. Sulisitsisutigoortumik aaqqissuussineq pineqarpat, tak. imm. 25, taamalu sulisitsisup sulisullu akileeqataassutigisartagaat sulisup akissarsiamigut isertitaasa 15%-it sinnersimappatigit 15%-it kisimik ilanngaatigineqarsinnaapput, 15%-iinnaallu sulisup aningaasarsiaanut akileraaruteqaataasussanut ilanngullugit naatsorsuunneqassanatik. Akileeqataassutini akiliutiniluunniit 15%-init amerlanerussutaasuni sulisitsisoq akileraarutinut A-nut unerartitsisassaaq, aningaasallu taakku akissarsiatut nalunaarutigineqassallutik. Sulisitsisup akileeqataassutai sulisullu nammineq akileeqataassutai sulisup akissarsiamigut isertitaanut tamarmiusunut ilannguneqassapput.


22. Ilanngaatit akissarsianit isertitat 15%-iinut qummut killissaat ataatsimoortumik ilanngaataavoq, tassanilu atorfinitsitaanermut atatillugu aaqqissuussinerit aamma aaqqissuussinerit nammineerluni pilersinneqartut ilaatinneqarput.


Ilanngaatit qummut killissalerneqarnerannik atuinermi sulisitsisoq aqqutigalugu aaqqissuussinerit aaqqissuussinernit nammineerluni pilersinneqarsimasunit salliutinneqassapput. Akileraartussaatitaasoq sulisitsisuni aqqutigalugu soraarnerussutisiaqarnissamik aaqqissuussisimappat pineqartup nammineq aaqqissuussinermigut soraarnerussutisiaqalernissamut akiliutini ilanngaatigisinnavai ilanngaatit amerlanerpaaffissaasa sulisitsisorlu aqqutigalugu aaqqissuussinermut akiliutaasartut assigiinngissutaasa taamaallaat amerlaqataannik. Taamaalilluni sulisitsisoq aqqutigalugu aaqqissuussinermut akiliutaasartut ilanngaatit amerlanerpaaffissaat angusimappassuk aaqqissuusinernut nammineq pilersinneqarsimasunut akiliutit ilanngaatigineqarsinnaassanngillat.


Akileraartussaatitaasoq soraarnerussutisiaqarnissamut nammineerluni aaqqissuinernik arlalinnik katillutik ilanngaatit amerlanerpaaffissaannik nalliisimasunik pilersitsisimappat, aaqqissuussineq siulliulluni pilersinneqarsimasoq siulliutinneqartassaaq (FiFo-princippet).


Ilanngaatit amerlanerpaaffissaat 15%-iusoq innersuussutigalugu ilanngaatit itigartitsissutigineqartut ukiumut aningaasarsiorfiusumut tulliuttumut nuunneqarsinnaanngillat.


23. Namminersorlutik inuussutissarsiortut ilanngaatit qummut killissaanni 15%-imi aamma ilaatinneqarput, tak. § 17b, imm. 4, oqaaseqatigiit pingajui. Inuit taakku sulinikkut nalinginnaasumik akissarsialittut akissarsineq ajormata akissarsiat naliliinikkut amerlassusilerneqartut naatsorsuinermi tunngavittut atorneqassapput. Naliliinermi inuussutissarsiortup suliaq taanna allamut imissutigalugu suliaritikkaluarpagu qanoq akiliisussaassagaluarsimanera aallaavigineqartassaaq. Taamaalilluni naliliineq suliffeqarfiup ukiumi ataatsimi tassani sinneqartooruteqarsimaneranit amigartooruteqarsimaneranilluunniit sunnerneqassanngilaq.


Akilersaarusiisarnermi oqartussat naamminersorluni inuussutissarsiortup pineqartup soraarnerussutisiaqarnissamik aaqqissuussinermut akiliutinut ilanngaatigisimasaanik naqqiissuteqarnissamut nalinginnaasumik periarfissaqarput.


24. Ukiumi aningaasarsiorfiusumi piginnittoq aaqqissuussinermut akissarsiatigut isertitami 15%-iinit amerlanerusunik akiliuteqarsimappat utertitsilluni akiliineq aningaasanik tunniussinertut isigineqassaaq, taamaattumillu aningaasarsiat akileraaruteqaataasussat naatsorsorneqarneranni taakku ilanngullugit naatsorsuunneqassallutik.


Taamaattorli pissutsit immikkut ittut tamanna ilalernartuutippassuk akileraarusiisoqassanngitsoq Skatterådi aalajangiisinnaavoq.


Kapitali 5


Sulisitsisup sulisumi pensionisiaqalernissaanut akileeqataassutai


aningaasarsianik nalunaaruteqarnermi


ilanngunneqartussaanngitsut (bortseelsesret).


Soraarnerussutisiaqarnissamik aaqqissuussinerit atorfinitsitaanermut ilaatillugit pilersinneqarsimasut - aningaasarsianik nalunaaruteqarnermi ilanngunneqartussaanngitsut (bortseelsesret).


25. Soraarnerussutisiaqarnissamik aaqqissuussineq ilanngaatigineqarsinnaasoq § 17b-mi imaluunniit § 17c-mi pineqartunut ilaatinneqartoq atorfinitsitaanermut ilagitillugu pilersinneqarpat (sulisitsisoq aqqutigalugu aaqqissuussineq) sulisitsisup sulisullu soraarnerussutisiaqarnissamut akileeqataassutit isumaqatigiissutigisaat sulisitsisumit akilerneqassapput, akileeqataassutillu akilerneqartut sulisup aningaasarsianik akileraaruteqaataasussanik naatsorsuinermini ilanngutissanngilai, tak. § 17b, imm. 5. Tamanna aamma atuuppoq akileeqataassutinut, soraarnerussutisiaqarnissaq pillugu isumaqatigiissummi "sulisitsisup akileeqataassutai"-nik taaneqartunut, aammalu akileeqataassutinut "sulisup akileeqataassutai"-nik imaluunniit "suleqataasup akileeqataassutai"-nik il.il. taasanut. Pisuni §17b, imm. 5 malillugu akiliutit akileeqataassutillu isiginiannginneqarfigisinnaasaanni aningaasat taakku § 17b, imm. 1 malillugu ilanngaatigineqarsinnaanngillat.


Sulisitsisoq.


26. Aningaasat soraarnerussutisiaqarnissamik aaqqissuussinermut sulisitsisup sulisuminut akiliussissutigisai § 17, imm. 1, nr. 1 malillugu sulisitsisup aningaasarsiaasa akileraaruteqaataasussat naatsorsorneqarneranni ilanngaatigineqarsinnaapput, sulisup akissarsiai ingerlatsinermi aningaasartuutitut isigalugit ilanngaatigineqarsinnaappata. Tamanna akileeqataassutinut ingerlaavartunut ataasiaannartumillu akileeqataassutinut sulisup soraareernerata kingorna imaluunniit sulisup toqunerata kingorna aappaasumut toqukkut qimataasumut isumannaallisaatitut imaluunniit meeqqanut pisartagassatut akilerneqarsimappata.


Sulisitsisup akiliutigineqartut ilanngaatigisinnaavai, sulisoq ilanngaatit amerlanerpaaffissaat 15%-iusoq innersuussutigalugu ilanngaateqarnissamik itigartinneqaraluarpalluunnit, tak. imm. 18-22.


Sulisitsisup pisortani sulisisunut Danmarkimeersunut akileeqataaassutaasa isiginngitsuusaarneqarsinnaanerat (bortseelsesret) - § 17c, imm. 4.


27. Akileraartarneq pillugu inatsimmi § 17c, imm. 4 malillugu isiginngitsuusaarinnissinnaaneq pisortani atorfeqartunut Danmarkimit tikisitanut taamaallaat atuuppoq, aatsaallu atuutissalluni aaqqissuussineq pinngitsorani atoqquneqarpat, tassa imaappoq isumaqatigiissutikkut assigisaatigulluunniit tamanna atorfinitsinneqartumut atoqquneqarpat, kiisalu aaqqissuussineq Kalaallit Nunaannut tikisitsinissaq sioqqullugu pilersinneqarsimappat.


28. Isiginngitsuusaarinnissinnaatitaanermi sulisitsisup naafferartumik akilersuilluni sillimmasiinermut, soraarnerussutisiaqalernissaq siunertaralugu naafferartumik akilersuilluni ileqqaakkanut naafferartumik tunniunneqartussanut, sillimmasiinernut akit nikerarneri najoqqutaralugit ileqqaakkanut, akit nikerarneri najoqqutaralugit ileqqaakkanut, ataatsikkut akiliilluni sillimmasiinernut soraarnerussutisiaqalernissamullu ileqqaakkanut ataatsikkut tunniunneqartussanut akileeqataassutai pineqartunut ilaatinneqarput.


Aalajangersakkami sulisitsisup akileeqataassutai kisimik pineqarput, taamaalillutillu sulisup aaqqissuussinermut nammineq akileeqataassutai ilanngaatigineqarsinnaassanngillat.


Tamaattorli aaqqissuussinerup danskit soraarnerussutisianik akileraarusersuineq pillugu inatsisaanni § 50-imi aalajangersagaq malillugu akileraarusersuinermut nuunneqarnissaa qinerneqarsimappat isiginngitsuusarinnissinnaatitaaneq atuutissanngilaq.


Kapitali 6


Ataatsimoortumik inuunermik sillimmasiisimasunut


ataasiaannartumillu tunniunneqartartut.


Ataatsimoorluni inuunermik sillimasiineq.


29. Ataatsimoorluni inuunermut sillimmasiinerit soraarnerussutisiaqarnissamut aningaasaateqarfinni peqatigiiffinniluunniit ilaasortanut pilersinneqarajuttarput.


Ataatsimoorluni inuunermut sillimmasiinermut akiliutit soraarnerussutisiaqarnissamut aningaasaateqarfimmit imaluunniit peqatigiiffimmit akilerneqartartut aningaasarsiat akileraaruteqaataasussat naatsorsorneqarneranni aningaasarsiatut B-tut naatsorsuunneqassapput.


30. Soraarnerussutisiaqarnissamut aningaasaateqarfimmi peqatigiiffimmiluunniit ilaasortat sillimasiinermut piginnittutut isigineqartarput, ilaasortallu toqunerani sillimasiisarfimmit taarsiissutitut bonusitulluunniit tunniunneqartut akileraaruteqaatasussaanngillat.


Annikitsukkuutaanik ingerlaavartumik tunniunneqartartut ataasiaannartumik tunniussassanngorlugit allanngortinneqarneri.


31. Soraarnerussutisiaqarnissamut aningaasaateqarfiit ileqqoreqqusatik malittarisassatilluunniit aqqutigalugit malittarisassanik aalajangersaasinnaapput, oqarlutik soraarnerussutisiaqarnissamik aaqqissuussineq pisut ilaanni ataasiaannartumik tunniunneqartussanngorlugu allanngortinneqarsinnaasoq, inuuneq naallugu ukiumoortumik ingerlaavartumik tunniunneqartartut 6.000 kr.-t sinnersimanngippatigit.


Aningaasat ataasiaannartumik tunniunneqartut ukiumi tunniussiviusumi aningaasarsiat akileraaruteqaataasussat naatsorsorneqarneranni ilanngullugit naatsorsuunneqassapput, tak. § 17b, imm. 3.


Kalaallit Nunaanni soraarnerussutisiaqarnissamut aningaasaateqarfinnit ilassutaasumik ataasiaannartumik tunniunneqartartut.


32. Soraarnerussutisiaqarnissaq siunertaralugu aaqqissuussinernut Kalaallit Nunaanni atorfeqarnermut atatillugu pilersinneqarsimasunut akileeqataassutit tamakkiisumik ilanngaatigineqarsinnaapput, aaqqissuussinerit taakku aningaasanngorlugit ataasiaannartumik tunniussinissamut periarfissanik imaqarluarunilluunniit, tak. § 17b, imm. 3a. Kalaallit Nunaanni soraarnerussutisiaqarnissamut aningaasaateqarfiit tassaapput soraarnerussutisiaqarnissamut aningaasaateqarfiit Kalaallit Nunaanni angerlarsimaffeqartut.


Ilanngaateqarsinnaassagaanni piumasaqaatigineqarpoq aningaasat ataasiaannartumik tunniunneqartut aningaasat soraarnerussutisiaqarnissaq siunertaralugu aaqqissuussinermut ingerlaavartumik ukiuni marlunni tunniunneqartartut amerlaqataat sinnersimassanngikkaat.


Ataasiaannartumik aningaasanngorlugit tunniunneqartut ukiumi tunniunneqarfimminni aningaasarsiat akileraaruteqaataasussat naatsorsorneqarneranni ilanngullugit naatsorsuunneqassapput, tak. § 17b, imm. 3 aamma 3a § 17b, imm. 6-imi oqaaseqatigiinnut siullernut atatillugu.


Danmarkimi soraarnerussutisiaqarnissamut aningaasaateqarfinnit ilassutaasumik ataasiaannartumik tunniunneqartartut.


33. Akiliutit akileeqataassutilluunniit ilaat soraarnerussutisiaqarnissaq siunertaralugu aaqqissuussinermi ataasiaannartumik tunniunneqartussanut atorneqartut aningaasarsiat akileraaruteqaataasussat naatsorsorneqarneranni aningaasarsiatut A-tut ilanngullugit naatsorsuunneqassapput.


Ataasiaannartumik aningaasanngorlugit danskit soraarnerussutisiaqarnissaq siunertaralugu aningaasaateqarfiini aaqqissuussinernit tunniunneqartut akileraaruteqaataasussaanngillat. Danskit soraarnerussutisiaqarnissamut aningaasaateqarfii tassaapput soraarnerussutisiaqarnissamut aningaasaateqarfiit Danmarkimi angerlarsimaffeqartut.


IMMIKKOORTOQ 2




Kapitali 7


Aaqqissuussinerit ilanngaatigineqarsinnaanngitsut, iluanaarutitaat ingerlaavartumik akileraarusersorneqartut - § 17d malillugu aaqqissuussinerit.


34. Inuunermut sillimasiinertigut aamma soraarnerussutisiaqarnissaq siunertaralugu aaqqissuussinertigut iluanaarutit § 17b-mi pineqartunut ilaatinneqanngitsut akileraarusersorneqassapput.


35. Iluanaarutit taakku naatsorsorneqassapput illuatungaani ukiup aningaasarsiorfiup aallartinnerani sillimmasiussap aningaasanngorlugu nalingisa ukiup ingerlanerani tunniunneqartunik ilaneqartut illuatungaanilu ukiup aningaasarsiorfiusup aallartinnerani sillimmasiussap aningaasanngorlugu nalingisa ukiup ingerlanerani akiliutigineqartunik ilaneqartut assigiinngissutaattut. Ukiup aningaasarsiorfiusup aallartinnerani naaneraniluunniit aningaasanngorlugu nalilinnik imaqanngippat, assersuutigalugu sillimmasiinerup naaneratigut atorunnaarsinneqarneratigulluunniit, taava iluanaarutit naatsorsorneqassapput tunniunneqartut akiliutigineqartullu nikingassutaattut.


Aningaasanngorlugit nalit danskit sillimmassiisarfiisa ukiut tamaasa naatsorsortassavaat, taakkulu Told og Skattestyrelsimut nalunaarutigalugit.


Sillimmasiineq nunani allani inuunermut sillimmasiisarfimmi pisimappat aningaasanngorlugu nalinga aamma taamatut naatsorsorneqassaaq. Qulaani taaneqartutut aningaasanngorlugit nalingi nunani allani sillimasiisarfiup ukiut tamaasa naatsortanngippatigit, assersuutigalugu ukiumoortumik bonusiliisoqartannginnera pissutigalugu, akileraartitsinermi oqartussat naliliinermikkut aningaasanngorlugit nalinginik amerlassusiliinissaminnut pisinnaatitaapput.


36. Tunniunneqartut aatsaat aningaasarsianut akileraaruteqaataasussanut ilanngullugit naatsorsuunneqassapput, tunniussinerit ingerlaavartumik tunniusinertut pisarsimappata. Ingerlaavartumik tunniussinermik matumani oqarnermi paasineqassaaq aningaasat aarlaleriarlugit, ukiut marluk sinnerlugit imaluunniit amerlanerusunut tunngassuteqartunik, tunniunneqartarsimasut.


37. Ukiup aningaasarsiorfiusup ingerlanerani akileraartussatitaaneq pilersimappat atorunnaarsimappalluunniit sillimmassiussap aningaasatigut nalinga piffissaq taanna aallarnerfigalugu atulissaaq, 1. januarimi imaluunniit 31. decemberimi aningaasatigut nalinik naatsorsuinermut taarsiullugu.


38. Ukiumi aningaasarsiorfiusumi aningaasat naliisigut amigartoorutaasinnaasut ukiumi aningaasarsiorfiusumi tassani iluanaaruteqarfiusumik isertitanit allanit ilanngaatigineqarsinnaanngillat, taamaallaalli ukiumi tulliuttumi sillimmassiissutip (policep) taassuma iluanaarutitaanit ilanngaatissanngortinneqassallutik akileraartarnermut inatsimmi § 21, imm. 1 tunngavigalugu. Taamaalillutik amigartoorutit sillimmasiissutiit (policet) allat iluanaarutitaannit ilanngaatigineqarsinnaassanngillat.


39. Iluanaarutit akileraarutigineqartussaanerannut pisussaaffik sillimassiissutip piginnittuaniilluniluunniit piginnittup toqunerata kingorna sillimasiissummit taarsiivigineqartumiippoq.


Kapitali 8


Aaqqissuussinerit ilanngaatigineqarsinnaanngitsut, iluannarutitaat


ingerlaavartumik akileraarusersorneqanngitsut.




40. Sillimmasiinerit sillimmasersimanerup naaffiissaatut isumaqatigiissutigineqarsimasoq nallertinnagu sillimmasertup toquneratigut imaluunniit innarluuteqalerneratigut/iloqianngorneratigut taamaallaat tunniunneqartartut akileraaruserneqartussaanngillat. Taamaattorli piumasaqaataavoq sillimmasiinerup atorunnaarfissaatut piffissaq isumaqatigiissutigineqartoq sillimmasersimasup 80-inik ukioqalernerata kingorna ullormit policep atuuffianit siullermit kingusinnerussanngitsoq.


41. Soraarnerussutisiaqalernissaq siunertaralugu naafferartumik akilersuilluni sillimmasiissutinit, soraarnerussutisiaqalernissaq siunertaralugu naafferartumik akilersuilluni ileqqaakkanut naafferartumik tunniunneqartussanit, sillimmasiinernut akit nikerarneri najoqqutaralugit ileqqaakkanit, akit nikerarneri najoqqutaralugit ileqqaakkanit, ataatsikkut akiliilluni sillimmasiinernit soraarnerussutisiaqalernissamullu ileqqaakkanut ataatsikkut tunniunneqartussanit iluanaarutit akileraaruserneqartussaanngillat.


Akileraarusiinnginnissami piumasaqaataavoq aaqqissuussinerit taakku soraarnerussutisianik akileraarusersuisarneq pillugu inatsimmi kapitalimi 1-imi malittarisassani pineqartunut ilaatinneqarnissaat.


42. § 17d malillugu aaqqissuussineq pineqartup akileraartussaatitaalernera sioqqullugu pilersinneqarsimappat § 17d, imm. 1 aamma 2 malillugit akileraarusersuisoqassanngitsoq Skatterådi aalajangiisinnaavoq.


Akileraarusiinnginnissami piumasaqaataavoq aaqqissuussineq pineqartoq naalagaaffimmi inuup pineqartup akiliinissap nalaani akileraartussaatitaaffiani akileraarutitigut oqilisaaviusumik aaqqiivigineqarsimanissaa.


Aammataaq piumasaqaataavoq akiliutit naalagaaffimmi pineqartumi akileraartarnermut inatsisit naapertorlugit iluanaarutaasumik isertitanit ilanngaatigineqareersimassasut.


Piumasaqaatip taassuma eqqortinneqarsimanerata uppernarsarnissaa akileraartartup pineqartup nammineq uppernarsagassaraa.


Kapitali 9


Paasissutissiisussaatitaaneq.




43. Sulisut tamaasa ataasiakkaarlugit eqqarsaatigalugit sulisitsisup akissarsiat allagartaanni nalunaassavaa aningaasat qanoq amerlatigisut sulisitsisup sulisullu soraarnerussutisiaqarnissaq siunertaralugu aaqqissuussinermut imaluunniit inuunermut sillimmasiinermut katillugit akileeqatassutigisimaneraat, taakkumi akileraartarnermut inatsimmi § 17b, imm. 5 malillugu isiginngitsuusaarneqarsinnaammata (bortseelsesret).


Soraarnerussutisiaqarnissamut aningaasaateqarfiit sillimasiisarfiillu aamma taamatut pisussaaffilerneqarsimapput, paasissutissiisussaatitaanerli soraarnerussutisiaqarnissamut aningaasaateqarfinnut Kalaallit Nunaata avataaniittunut atortinniarneqarsinnaanngimmat Kalaallit Nunaanni soraarnerussutisiaqarnissamut aningaasaateqarfiit kisimik malittarisassami tassani pineqartunut ilaatinneqarput.


44. Soraarnerussutisiaqarnissamik akuersissut imaluunniit sillimmasiinermut uppernarsaat aaqqissuussinernik akuleriissitanik arlalinnik imaqarpat, akileeqataassutillu akiliutilluunniit ilaat § 17b-mi pineqartunut ilaatinneqaratik, taava soraarnerussutisiaqarnissamik akuersissummi imaluunnit sillimmasiinermut uppernasaammi allanneqassaaq akileeqataassutit imaluunniit akiliutit soraarnerussutisianut sillimasiinernulluunniit assigiinngitsunut qanoq agguataarneqarsimanersut, taamatuttaarlu soraarnerussutisiaqarnissamut aningaasaateqarfiup sillimasiisarfiulluunniit aningaasatigut agguataarisimaneq ukiut tamaasa nalunaarutigisartussaallugu.


Paasissutissiisussaatitaaneq soraarnerussutisiaqarnissamut aningaasaateqarfinnit sillimmasiisarfinnilluunniit Kalaallit Nunaata avataani inissisimasunit nammineq piumassuseq tunngavigalugu eqqortinneqanngippat akileraarusiisarnermi oqartussat agguataarineq naliliinermikkut aalajangertariaqarpaat, tak. imm. 7.


Kapitali 10


Ikaarsaariarnermi malittarisassat.




45. Inuunermut sillimmasiinerit 18. februar 1992 sioqqullugu pilersinneqarsimasut, ullorlu taanna sioqqullugu soraarnerussutisianik akileraarusersuisarneq pillugu inatsimmi § 50-imut atatinneqarsimasut piffissaq nallertinnagu atorunnaarsinneqarunik akileraarusersorneqassanngillat, taamatuttaarlu inunermut sillimmasiinernut taakkununnga akiliutit akilerneqarsimasut aningaasarsiat akileraaruteqaataasussat naatsorsorneqarnerini ilanngaatigineqarsinnaasussaallutik.


46. Inuunermut sillimmasiinerit il.il. soraarnerussutisianik akileraarusersuisarneq pillugu inatsimmi kapitali 1-imi pineqartunut ilaatinneqanngitsut, piffissamilu 18. februar 1992-ip aamma 25. marts 1995-ip akornanni pilersinneqarsimasut eqqarsaatigalugit ikaarsariarnermi immikkut ittumik aaqqissuussineq atuuppoq.


Inuunermut sillimmasiinerup il.il. pisiareqqinneqarnerani akia 26. maj 1995-imi naatsorsorneqarsimasoq pisiareqqiinerup nalaani aningaasarsiat akileraaruteqaataasussat naatsorsorneqarneranni ilanngullugu naatsorsuunneqassaaq, taamaattorli kingusinnerpaamik akileraartussaatitaanerup atorunnaarnerata nalaani.


Akileraartussaatitaaneq suli atuutilinngitsoq akiliuteqartoqartarsimappat piseqqinnermi aki tassunga naapertuuttumik naatsorsorneqassaaq.


Aaqqissuussinerup atorunnaarsinneqarneranut atatillugu sillimmasiisarfimmut akiliutaasimasinnaasut piseqqinnermi malimit akileraaruteqaataasussamit ilanngaatigineqassapput.


Sillimmasersimasoq 26. maj 1995-ip kingorna inuunermut sillimmasiinermut taamaattumut akiliisarnerminik ingerlatsiinnaruni akiliutit akilersimasani aningaasarsiaminik akileraaruteqaataasussanik naatsorsuinermini ilanngaatigisinnaassanngilai.


47. Aaqqissuussinermik 26. maj 1995-imi piseqqinnermi naligitinneqartut 1. oktober 1995 nallertinnagu § 17b malillugu aaqqissuussinermut nuunneqarpata akileraarusiisoqassanngilaq, taamatuttaarlu piffissami tassani akileeqataassutaasimasinnaasut akiliutaasimasinnaasullu aningaasarsianik akileraaruteqaataasussanik naatsorsuinermi ilanngaatigineqarsinnaassallutik.


Taamatut pisoqarnerani ukiumut aningaasarsiorfiusumut 1995-imut ilanngaatit amerlanerpaaffissaannik 15%-inik naatsorsuinermi aaqqissuussinermut 1. januar 1995 sioqqullugu akiliutigineqarsimasut isiginngitsuusaarneqassapput.


26. maj 1995-ip kingorna amerleriaatit § 17d-mi malittarisassat malillugit akileraarusersorneqassapput.




Sidst opdateret den 25. oktoberi