Akileraarutit A-nit annaasat agguaanneqartarnerat pillugu Akileraartarnermi Pisortaqarfiup kaajallaasitaa nr. 1, 15. juni 1995-imeersoq

Akileraarutit A-nit annaasat agguaanneqartarnerat pillugu Akileraartarnermi Pisortaqarfiup kaajallaasitaa nr. 1, 15. juni 1995-imeersoq.


Akileraarutit akiligassat kommunit landskarsillu akornanni isumannaarneqartarneri pillugit Namminersornerullutik Oqartussat nalunaarutaanni nr. 15-imi 15. juni 1995-imeersumi § 8, imm. 2 aamma 4 kiisalu § 13 tunngavigalugit akileraa-rutit A-nit annaasat killilersimaarneqarnissaannut aamma akileraarutit A-nit annaasat il.il. akiligassaajunnaarsinneqarneranni tunngaviusup nalunaarutigineqar-tarnerat pillugu maleruagassat makku aalajangersarneqarput:


1. Ajunaarutit agguaanneqartarnerat.


Landskarsip annaasat ilaat unerartitsisussaatitap akileraarutit A-nik akiliisimannginneratigut annaasani kisiisa nammassavai kaajallaasitami uani peqqussutit naammassineqarsimagaangata.


2. Akiliisitsiniartuaannartarnissaq.


Akiliisinniarneqartuaannartassaaq unerartitsisussaatitaasoq unerartitsinermi imaluunniit nassuiaatinik tunniussisarnissami peqqissaannginnermik imaluunniit suliassaminik nakkutilliinnginnermik takutitsisoq, isumaqartoqarpallu akiliisinniarneqartuartarnissaa pisariaqartoq annertuumik ajunaaruteqarnissaq pinngitsoorniarlugu.


Peqqissaannginneq imaluunniit suliassamik nakkutilliinnginneq takutinneqassaaq soorlu unerartitsisussaatitaasoq:


1) nassuiaatinik piffissaq eqqorlugu nassitsineq ajorpat,


2) nassuiaatinik amigaatilinnik nassitsisarpat, imaluunniit


3) akileraarutit A-nik unerartitanik piffissaq eqqorlugu akiliineq ajorpat.


Ajunaaruteqartoqaratarsinnaasarpoq, assersuutigalugu


1) unerartitsisussaatitaasoq qaammatini kingullerne aqqaneq-marlunni pingasoriarluni piffissaq eqqorlugu akiliinngikkaangat,


2) akiligassanit akilinngitsuukkat akilerneqarnissaat qularnarunnaarsinneqarsimanngippat akiliussisoqarallarneratigut imaluunniit nammineq piumassutsimik qularnaveeqqusiinikkut, imaluunniit


3) unerartitsisussaatitaasoq akiliisarnerminik unitsitsippat.


Akiliisinniarneqartuaannartarsinnaavortaaq unerartitsisussaatitaasoq, peqqissaannginnermik imaluunniit suliassaminik nakkutilliinnginnermik siusinnerusukkut takutitsereersimasoq, tunngavissaqartumik ilimagisariaqarpat suliffimmik nutaamik aallartitsiguni peqqissaannginnermik imaluunniit suliassaminik nakkutilliinnginnermik takutitsiumaartoq. Tamanna atuutissaaq suliffiup allap aallarnerneqarnerani tassunga akisussaasumut piginneqataasumulluunniit taamatullu piginneqataasunit pingaarnerpaasumut imaluunniit aningaasaliissuteqarnerpaasumut.


Nalinginnaasumik akiliisitsiniartuaannartoqartassanngilaq peqqissaannginneq suliassamilluunniit nakkutilliinnginneq ataasiaannarluni takutinneqarpat.


Sulisitsisup kommuniata akiliisitsiniartuaannartoqartarnissaanik peqqussutigisaa allakkatigut tammatsaaliugassanngortitatigut assigisaasigulluunniit unerartitsisussaatitaasumut nalunaarutigineqassaaq. Taakkunani allassimassaaq:


1) peqqussutip ullormit sumit sunniuteqalernissaa,


2) akileraarutit A-t unerartitat akilerneqartassasut ullup akissarsisitsiffiup kinguninngua,


3) peqqussutigineqartoq malinneqanngippat tamatuma kinguneriumaaraa akiliutit tiguniarnissaannut tunngavissatut akiliutigititaagallartussat missiliuussinikkut angissusilerneqarnissaat, aamma


4) unerartitsisussaatitaasoq akileraarutit pillugit inatsimmi § 107 tunngavigalugu pineqaatissinniarneqarumaartoq akileraarutit A-t peqqussutigisaq naapertorlugu isumannaarneqanngippata.


Nassuiaat peqqusineq malillugu nassiunneqanngippat sulisitsisup kommuniata erniinnaq, peqquneqartoq ornilluguluunniit, akiliutigititaagallartussat qanoq annertutiginissaat aalajangissavaa. Akiliutigititaagallartussat naatsorsorluarlugit annertussusilerneqarsinnaanngippata missiliuussinikkut annertussusilerneqassapput.


Akiliisitsiniartuaannartaqqusinermik peqqussut atorunnaarsinneqartariaqarpoq aatsaat unerartitsisussaatitaasup akiligassat akilinngitsuukkat akilerpagit, tamatumalu kingorna akileraarutit A-t unerartitat minnerpaamik qaammatini pingasuni piffissaq eqqorlugu akilertarpagit.


3. Akiliutissat tiguniarneqartarnerat.


Sulisitsisup kommuniata unerartitsisussaatitaasoq akiliisinniarneqartuaannaqqugaluarpaguluunniit sulisitsisup kommuniata aamma akileraarutit A-t akilernissaasa kinguaattoorutigineqarneratigut annaasaqaataasussat killilersimaarniartassavai akiliutissat tiguniarneqarnissaannut isumannaallisaanissamullu tunngasutigut iliuuseqarnikkut. Tamatumunnga atatillugu unerartitsisussaatitaasup akiliisinnaajunnaartutut nalunaarutigeqquneqarnissaa pissutsit tunngavigalugit isumaliutigineqartarsinnaavoq.


Akiliutissat tiguniarneqartarneranni iliuusissat aalajangerneqartassapput unerartitsisussaatitaasup aningaasanut tunngasutigut siusinnerusukkut maannakkullu qanoq innerata siunissamilu qanoq ikkumaarnissaata naliliiffiginiarluarneqarnerat tunngavigalugu.


4. Akiitsut pillugit nalunaarusiorneq.


Sulisitsisup kommunia pisussaavoq unerartitsisussaatitaasup akileraarutinik A-nik akiliisimannginnera pillugu qaammatit pingasukkuutaarlugit Akileraartarnermi Pisortaqarfimmut nalunaaruteqartassalluni, unerartitsisussaatitaasup akiligassat akilinngitsuugai 50.000 koruuniuppata amerlanerullutilluunniit aammalu akiliinissamut killissarititaasoq qaammatit pingasut sinnerlugit qaangerneqarsimagaangat.


Nalunaarusiaq marsip 31-anni, juunip 30-anni, oktobarip 31-anni decembarillu 31-anni suliarineqarsimasoq Akileraartarnermi Pisortaqarfimmi tiguneqareersimassaaq qaammatit pingasut qaangiuttut kingornatigut qaammatip naanerani.


Nalunaarusiami ilanngunneqarsimasassapputtaaq sulisitsisup kommuniata akiliutissat tiguniarneqarnissaannut isumannaallisaanissamullu tunngasutigut iliuuserisaasa naatsumik allaaserinerat aammalu akiliisitsiniartuaannartoqartarnissaa pillugu peqqussutaasimajunnartunik eqqortitsisoqartarsimanersoq.


Nalunaarusiaq immersugassaq Akileraartarnermi Pisortaqarfimmit suliarineqarsimasoq atorlugu allanneqartassaaq.


Sulisitsisup kommunia pisussaavortaaq akiligassanit akilinngitsuukkat akiliutissallu tiguniarneqartarnerat pillugu paasissutissanik arlaqarnerusunik Akileraartarnermi Pisortaqarfik ikiortassallugu.


5. Akilligassaajunnaarsitsinermi tunngaviusup nalunaarutigineqarnera.


Ukioq naatinnagu sulisitsisup kommuniata ukiup ingerlanerani annaasat 50.000 koruunit taakkuluunniit sinnerlugit akiligassaajunnaarsinneqarsimasut, unerartitsisussaatitaasup akileraarutit A-nik akiliisitsinngitsoorsimaneranik pissuteqartut Akileraartarnermi Pisortaqarfimmut nalunaarutigissavai.


Nalunaarusiaq akiligassaajunnaarsitsinermi tunngaviusumik ilaqartinneqassaaq tamatumunnga uppernarsaammik ilanngullugu nassiussinikkut. Nalunaaruteqarneq pissaaq immersugassaq Akileraartarnermi Pisortaqarfimmit suliarineqarsimasoq atorlugu.


Akilerneqarsinnaanngitsutut naatsorsuutigineqarnerat pissutigalugu annaasanik akiligiassaajunnaarsitsinikkut annaasat landskarsimit nammanneqartussat ukiup naanerani landskarsimi nalunaarsorneqartinnagit Akileraartarnermi Pisortaqarfik akuersitinneqaqqaassaaq. Akileraartarnermi Pisortaqarfik akuersissummik qinnuigitinnagu sulisitsisup kommunia annaasat annertussusiat unerartitsisussaatitaasullu aningaasaqarniarnikkut pissusai pillugit Akileraartarnermi Pisortaqarfimmut paasissutissiissaaq. Paasissutissiinermi immersugassaq Akileraartarnermi Pisortaqarfimmit suliarineqarsimasoq atorneqassaaq.


Annaasat akilerneqarsinnaanngitsutut naatsorsuutigineqarnerat pissutigalugu annaasat Akileraartarnermi Pisortaqarfimmit akuersissutigineqarpata, sulisitsisup kommunia pisussaavoq kingusinnerpaamik ukiup naatsorsuiffiusup naaneranit qaammatip naanerani ukiut tamaasa Akileraartarnermi Pisortaqarfimmut nalunaaruteqassalluni, ukiumi naatsorsuiffiusumi qaangiuttumi akiligassanik akiligassaajunnaarsinneqarsimasunik taamaattunik akiliisoqarsimanersoq. Tamatumunnga peqatigitillugu kommunip nalunaarutigissavaa, akiligassat sorliit ukiup naatsorsuiffiusup ingerlanerani nutaanngilisoorneq assigisaallu pillugit maleruagassat tunngavigalugit atorunnaarsimanersut.


Akilerneqarsinnaanngitsutut naatsorsuutigineqarnerat pissutigalugu annaasat A-kileraartarnermi Pisortaqarfimmit akuersissutigineqarnerat atorunnaassaaq, tamatuma kingorna paasinarsippat akilerneqarsinnaanngitsutut isigineqarsinnaanngitsut. Taamaattoqartillugu sulisitsisup kommunia pisussaavoq landskarsimut ajunaarutaasussat, taamatut pisoqarnera pissutigalugu kommunip landskarsimit pissarsiarisimasai, ingerlaannaq landskarsimut akilissallugit.


6. Aalajangersakkat allat.


Akileraartarnermi Pisortaqarfiup aalajangertassavaa annaasat agguaanneqartar-nissaat pillugu piumasarisat pillugit kaajallaasitaq una eqqortinneqarsimanersoq.


7. Atortuulersitsinermi ikaarsaariarnermilu aalajangersakkat.


Kaajallaasitaq una atortuulissaaq juulip aallaqqaataani 1995-imi.


Unerartitsisussaatitap akileraarutit A-nik akiliisimannginneranik pissuteqartumik 1994-imi januaarip aallaqqaataanit 1995-imi juunip 30-annut akiligassanit akilinngitsuukkat 50.000 koruunit taakkunanngaluunniit amerlanerusut pillugit sulisitsisup kommuniata 1995-imi augustusip 31-at nallertinnagu Akileraartarnermi Pisortaqarfik imm. 4-mi aamma 5-imi taaneqartutut nalunaarfigissavaa. Taamatut akilinngitsuuisoqartillugu Akileraartarnermi Pisortaqarfiup landskarsip annaasat ilaannik nammataqarnissaanut piumasarisat imm. 4 naapertorlugu naammassineqarsimanersut aalajangissavaa, aalajangiisuutillugit annaasat killilersimaarniarlugit iliuuserisat iliuusereqqullugit kaajallaasitap matuma atortuulernissaa sioqqullugu piumasarineqarsinnaalluartut.



Sidst opdateret den 25. oktoberi 2005