Akileraaruserinermik ingerlatsineq pillugu Inatsisartut inatsisaat nr. 11, 2. november 2006-imeersumi § 15, imm. 3 tunngavigalugu immikkut akuersissuteqartarnerit pillugit Kaajallaasitaq nr. 1, 13. februar 2007-meersoq

Akileraartarnermut Pisortaqarfik

Aallaqqaasiut

Akileraarutaagallartut amerlanaarlugit akilikkat siusinaartumik utertillugit akiliutigineqartarnerat pillugu suliat, § 15 tunngavigalugu akiliuteqartarnernik taaneqartartut (siusinnerusukkut § 50 tunngavigalugu akiliuteqartarnerit) assigiissaakkamik tunngaveqarluni suliarineqartarnissaat qulakkeerniarlugu akileraaruserinermik ingerlatsineq pillugu Inatsisartut inatsisaat nr. 11, 2. november 2006-imeersukkut taamatut akiliuteqartarnernut aningaasat 5.000 koruuninik ikinnerpaaffissalerneqarput.

Ikinnerpaaffiliilluni killiliinikkut siunertaavoq tamakkununnga tunngasuni manna tikillugu suleriaatsip assigiinnginnerata assigiissarneqarnissaa taamatullu taamatut utertitsilluni akiliuteqartarnermik suliat amerlassusiisa killilerneqarnissaat.

Tamakku saniatigut eqqarsaatersuutinut ilaavoq kommunit ilaasa tamakkununnga tunngasunik qasungavallaamik allaffissornikkut ingerlatsisalersimaneret. Tamatuma pissusiviusutigut kingunerisarpaa nammineerluni nalunaarsuinernik amerlasoorpassuarnik annertussusiliisarnerup siuartinneqartarnera. Taamatut siuartitsisarnerup qitiusumiit akileraarutinik allaffissornikkut aqutsinermi pissusissamisuunngitsumik sulinermik aaqqissuussisarneq annertussusiliiniarlunilu sulinerup pitsaannginnerulerneranik kinguneqassaaq.

Ikinnerpaaffissaliilluni killiliinermuttaaq ilanngullugu isiginiarneqarpoq Akileraartarnermut Pisortaqarfimmi nutaami siumoortumik nalunaarsuisarneq pingaarnerpaat ilaattut isiginiarneqalissammat. Pitsaanerusumik siumoortumik nalunaarsuisalernikkut ilaatigut akileraarutissanik sippuisimanerit annikinnerusut imaluunniit akileraarutissat sinneruttut pillugit suliassarparsuit ikilisinneqarsinnaapput.

Kiisalu ikiunnerpaaffissaliilluni killiliineq § 15-imi pineqartoq akileraarutissat sinneri pillugit allannguinermut attumassuteqarpoq, tassani akileraamutissat sinneri 18.000 koruunit tungaannuut ukiup tullianut akileraarutaagallartussanut naatsorsuuneqartassapput.

5.000 koruunik ikinnerpaaffissaliilluni killiliinerup atulersinneqarneranut peqatigitillugu Inatsisartut aalajangiipput Akileraartarnermut Pisortaqarfik ikinnerpaaffissaliilluni killiliinerup sanioqqunneqarsinnaaneranut immikkut akuersissuteqarsinnaatitaassasoq, tassa akileraartussaatitaasoq inuttut atukkatigut annertuumik naatsorsuutiginngisamik nalaataqarsimappat.

Inatsisini tunngavigisaq

Ingerlatsineq pillugu inatsimmi § 15, imm. 3, imaappoq:

Akileraartartoq inuttut atukkatigut annertuumik naatsorsuutiginngisamik eqqugaasimappat, aningaasanik imm. 1-mi taaneqartunit ikinnerusunik utertoorutissaqarpat, akileraaruseriffiup qinnuteqartoqartillugu akuersissuteqarfigisinnaavaa.

Aalajangersakkamut oqaaseqaatini imatut allassimasoqarpoq:

Imm. 3-mut

Aalajangersagaq atorneqartassaaq akileraartartup inuttut atukkatigut annertuumik naatsorsuutiginngisamik eqqugaanermigut aningaasartuuteqarnerulerfiini tassanngaannartumillu pisariaqartitsilerfiani. Assersuutigalugu tunngaviusumik inuttut atukkatigut annertuumik naatsorsuutiginngisamik eqqugaaneq taassaasinnavoq, ilaquttani qanitani toqukkut qimaguttoqarsimaneranut aningaasartuteqarnerulerneq, naatsorsuutiginngisamik innaallagissamut imermullu akiliuteqaqqequsinermi, akileeqqusinermi akiliuteqartoqanngippat atugassarititat taakku matuneqarsinnaanerinik kinguneqartitsissappata aammalu inuttut inuuniarnermi atugassarititat assingusunut tunngatillugu iluaqusiiffiusinnaasut allannguteqangaatsiarfiini. Taamatulli aningaasanik utertsilernermi piumasaqataavoq, akileraartartup nammineq nalunaaruteqarnermigut, naatsorsuuserinermigut, akissarsiat allagartaasigut assigisaatigulluunniit uppernarsarsinnaaguniuk akileraarutaagallartunit amerlanernik akiliivallaarsimalluni, taamaattumillu akileraarutitigut utertoorutissanik akilerneqartussaalluni.

Immikkoortortaqarfiit sulianik ingerlatsinerat

Immikkoortortaqarfiit Ingerlatsineq pillugu inatsimmi § 15, imm. 3 naapertorlugu sulianik ingerlatsinerminni uku maluginiassavaat:

  1. Akileraartartoq nammineerluni nalunaarsuiffik, naatsorsuutit, aningaasarsiat allagartaat assigisaalluunniit atorlugit uppernarsaasinnaassaaq akileraarutaagallartuni akiliivallaarsimalluni taamaammallu akileraarutinut sippukkaminit akiliuteqarfigineqarnissani piumasaqaatigisinnaagaa isumaqarfigineqarsinnaalluni.
  2. Akileraartartoq inuttut atukkatigut annertuumik naatsorsuutiginngisamik eqqugaasimassaaq.
  3. Akileraartartup inuttut atukkatigut eqqugaaneq naatsorsuutigereersinnaasimassanngilaa.
  4. Akileraartartup inuttut atukkatigut annertuumik naatsorsuutiginngisamik eqqugaasimanini pissutigalugu aningaasartuuteqartariaqalernini uppernarsarsinnaassavaa.

Immikkoortut taakku sisamat matuma kinguliini itisilerneqassapput.

1-imut. Akileraarutinik sippuisimanermik uppernarsaaneq

Immikkut akuersissuteqarnissamut malittarisassamik atuissagaanni pisariaqanngilaq nammineerluni nalunaarsuiffiup annertussusiliivigineqarsimanissaa.

Aappaatigut suliamik misissuinikkut immikkoortortaqarfimmit paasineqarsimassaaq akileraartartoq akileraarutinik sippukkaminik utertillugit akiliuteqarfigineqartariaqartoq. Taamaalilluni immikkoortortaqarfiup aalajangiilinnginnermini qulakkeersimassavaa paasissutissat pisariaqartinneqartut tamarmik (aningaasarsiat allagartaat, naatsorsuutit il.il.) pigineqariissammata.

2-mut. Inuttut atukkatigut annertuumik naatsorsuutiginngisamik eqqugaasimaneq

Inuttut atukkatigut annertuumik naatsorsuutiginngisamik eqqugaasimanertut assersuutigineqarsinnaapput:

  • Akileraartartup qaniginerpaasatut ilaqutaanik tassanngaannartumik toqusoqarnera imaluunniit perulunnartumik napparsimasoqarnera,
  • Innaallagiaq imerlu pillugit naatsorsuutigeriinngisamik akileeqquseqqittoqarnera, akiliisoqanngippat pilersuinerup unitsinneqarneranik kinguneqartussamik,
  • Naatsorsuutigeriinngisamik inigisamiit anisitaanissamik ulorianartorsiortitsisoqalernera ineqarnermut akiliutissanik akiliisoqartarsimannginnerata kingunerisaanik,
  • Suliffissaaruteriataarneq.

Pisut assingusut allat taamatuttaaq aalajangersakkamik atuiffiusinnaasutut isigineqarsinnaapput, tamatumani toqqissisimanartumik inuuneqaannassagaanni inuuniarnermi pisimasuusimappata annertuut.

Pissutsinut inuttut atukkatigut annertuumik naatsorsuutiginngisamik eqqugaasimanertut aalajangersakkap paasineqarnissaani naatsorsuutigineqarsinnaanngitsutut assersuutitut taaneqarsinnaapput:

  • Sivisunerusumik suliffissaarusimaneq,
  • nuunneq,
  • ilinniakkamik aallartitsineq.

Ajoraluartumik inuttut atukkatigut annertuumik pisartut tamakkiisumik taagermissaat pisiinnaanngilag. Taamaammat immikkoortortaqarfinni allaffiit nalornisoqalersillugu qitigusumik allaffik attaveqarfigisariaqartassavaat oqaloqatigiinnissaq siunertaralugu.

3-mut. Naatsorsuutigeriinngisat

Inuttut atukkatigut annertuumik pisimasussaanerata saniatigut pisut tamakku naatsorsuutigineqareersimassanngillat, tassa immikkut akuersissuteqarnissamut aalajangersagaq atorneqarsinnaassappat.

Akileraartartup inuuniarnermi pisoq naatsorsuutigereersimasinnaasimappagu taamaattumillu aningaasartuutissat pineqartut akilernissaannut ileqqaarnissamut assigisaannilluunniit periarfissaqarsimalluni, pissutsit immikkut akuersissuteqarnissamut aalajangersakkanut attuumassuteqartinneqarsinnaassanngillat.

Aalajangersakkap avataaniissaaq assersuutigalugu ilaquttatut qanigisaq sivisuumik perulunnartumik napparsimareerluni toqusimappat.

Assersuutigalugu paarlattuanik pissutsit imaassimassappata aappaasup aappaa nalinginnaasumik ineqarnermut akiligassanik akilersuisuusimalluni aappaasullu aappaata aatsaat akiliisoqartarsimannginnera attartukkamit anisitaaqqajaalernermik ulorianartorsiulernermi paasillugu pisoq immikkut akuersissuteqartarnermi aalajangersakkamik atuiffiusinnaavoq, aappaasup aappaata ulorianartorsiulerneq naatsorsuutigereersinnaasimagaluarpaguluunniit.

4-mut. Aningaasartuuteqarnerusariaqalernermik uppernarsaaneq

Akileraartartup uppernarsassavaa ilumoornerarluguluunniit pineqartup inuttut atukkatigut annertuumik pisup kingunerisaanik aningaasartuutaanerulersunik akiliisussaanini.

Tassunga atatillugu uppernarsaasiinerup ilumoorneraanerulluunniit qanoq issusissaanut sukangasuunik piumasaqaateqartoqartariaqanngilaq. Piumasaqaateqarnikkut inuuniarnermi pisup aningaasartuuteqarnerusariaqalernerulluunniit akornanni ataqatigiittoqarnersoq siunertarineqaannarpoq.

Taamaammat ilaatigut ingerlatsineq pillugu inatsimmi § 15, imm. 3 malillugu akiliutaasimajunnartut siunertatut taaneqartumut atorneqavissimanersut nakkutilliisoqartariaqanngilaq.

Naggasiineq

Ingerlatsineq pillugu inatsimmi § 15, imm. 3 malillugu akiliuteqartoqarnissaanik qinnuteqaatit immikkoortortaqarfinnut tunniunneqartassapput. Immikkoortortaqarfiit akileraartartoq aalajangiineq pillugu akileraarusiinernik aalajangiisartunut naammagittaalliuuteqarnissamut ilitsersuut ilanngullugu allakkatigut nalunaarfigissavaat.

Taamatuttaaq suliat ingerlatsineq pillugu inatsimmi § 15, imm. 3 malillugu, INFOB 11/2007-imi allassimasutut, suliarineqartassapput. Taamaalilluni ilaatigut qinnuteqaat akuerineqartillugu akiliisitsiniartarfinnut akiliuteqarfigineqartut allattorsimaffiinik nassiussisoqartassaaq.

Akileraartarnermut Pisortaqarfik

Nuuk, ulloq 13. februar 2007


Kaare Hagemann

/

Morten W. Selvejer



Sidst opdateret den 1. marsi 2007