Nalunaarneq

Inuussutissarsiummik Ingerlataqartunik Nalunaarsuiffik pillugu Inatsisartut inatsisaat nr. 10, 29. oktober 1999-imeersoq naapertorlugu Kalaallit Nunaanni suliffeqarfiit pisortat pigisaat namminersortullu tamamik Inuussutissarsiummik Ingerlataqartunik Nalunaarsuiffimmut IIN nalunaarnissaminnut pisussaaffeqarput. Tamanna isumaqarpoq aamma ingerlatseqatigiiffiit pigineqartut pisortallu ingerlatsivii soorlu atuarfiit meeqqeriviillu IIN-mut nalunaassasut.

Nalunaarniarluni immersugassat Akileraartarnermut Aqutsisoqarfimmut saaffiginninnikkut pissarsiarineqarsinnaapput, imaluunniit nammineq internettikkut aaneqarsinnaallutik immersugassallu allallugit, taakku uani nassaarisinnaavatit: Suliffeqarfiup immersugassaa (pdf) aamma Ingerlatsiviup immersugassaa (pdf)

Immersukkat tiguneqartut tunngavigalugit immikkut paatsoorneqarsinnaanngitsumik aamma nalinginnaasumik atorneqarsinnaasumik ilisarnaammik IIN-normumik suliffeqarfiit tamarmik Akileraartarnermut Aqutsisoqarfimmiit tunineqassapput. Ingerlatsiviit ataaniittut pisortallu suliffiutaat D-normumik tunineqassapput.

IIN-normu siunissami suliffeqarfiit tamarmik ilisarnaatitut normorissavaat pingaarneq, soorlu CPR-normu inunnut taamaattoq. Taamaalilluni assersuutigalugu pisortat suliarinnittussarsiuussineranni neqerooruteqarnermut, qinnuteqarnermut, akiligassanik akiliinermut akileraarutinillu akiliinermut atatillugu pisortanik attaveqarnermi nammineq IIN-normuni suliffeqarfiup atortassagaa piumasaqaataassaaq.

Nalunaarneq pillugu apeqqutissaqaruit imaluunniit ajornartorsiuteqaruit Akileraartarnermut Aqutsisoqarfik oqarasuaat 34 65 00 imaluunniit e-mail ger@nanoq.gl atorlugu saaffigisinnaavat.