Tusagassiutinut nalunaarut 2016-imut akileraarutinut inaarummik naatsorsuutit

Akileraartarnermut Aqutsisoqarfiup 2016-imut inaarummik naatsorsuutit 48.200 sinnerlugit akileraartartunut nassiussuuteqqammerpai.

2017-imi augustip 31-iani Akileraartarnermut Aqutsisoqarfiup ukiumut akileraarfiusumut 2016-imut akileraarpallaarutinut utertoorutissat 158,5 mio. koruunit inunnut 22.390-nut utertissavai.
Akileraartarnermut Aqutsisoqarfiup 158,5 mio. koruuninit ilanngaassinikkut, pisinnaatitaaffimmik tigusisoqarneratigut akiliisitsinikkut kiisalu pigisanik qularnaveeqqutitut sillimmasiinikkut 46 mio. koruunit (utertoorutissat tamarmiusut 29 %-iisa missaat) pisortanut akiitsunut matusissutigalugit akilersinneqarput. 26 mio. koruunit Kalaallit Nunaanni kommuninut, inissiaatileqatigiiffinnut Inimut Iseritsimullu aammalu Nukissiorfinnut il.il. akiitsunut matusissutitut akilersinneqarput, sinneruttut 20 mio. koruunit Kalaallit Nunaanni Namminersorlutik Oqartussanut akiitsunut matusissutigineqarput.

Akileraartartut akileraarpallaarummik utertoorutissaat, pisortanut akiitsunut, tamakkiisumik ilaannakuusumilluunniit matussutissatut atorneqarsimatillugit immikkut ittumik allakkatigut nalunaarfigineqassapput.
Akileraartartut aningaaserivinnut paasissutissanik inaarummi naqeriikkami 2016-imut tunniussisimasut akileraarutinullu akiliivallaarsimasut ulloq 31. august 2017-imi nuussiffigineqassapput.
Innuttaasunut aningaaserivinnut paasissutissanik inaarummi naqeriikkami 2016-imut nalunaaruteqarsimanngitsunut, aningaasat tunniunneqartussat uninngatinneqassapput. Akileraartarnermut Aqutsisoqarfiup aningaasat aatsaat tunniussinnaavai, aningaaserivinnut paasissutissat, (registreringsnormu, kontonormulu) Akileraartarmermut Aqutsisoqarfiup pissarsiarereerpagit. Inuit pineqartut tamanna pillugu Akileraartarnermut Aqutsisoqarfimmut saaffiginneqquneqarput.

Akileraartarnermut Aqutsisoqarfiup 2017-imi upernaakkut akileraarpallaarutit § 15 naapertorlugu (akileraarpallaarutinik siusinaartumik utertitsineq), ukiumut akileraarfiusumut 2016-imut utertoorutissat 16,6 mio. koruunit inunnut 1.076-inut utertippai.

16,6 mio. Koruuninit Akileraartarnermut Aqutsisoqarfik ilanngaassinikkut, pisinnaatitaaffimmik tigusisoqarneratigut akiliisitsinikkut kiisalu pigisanik qularnaveeqqutitut sillimmasiinikkut 3,6 mio. Koruunit, utertoorutissat tamarmiusut 22 %-iisa missaat, pisortanut akiitsunut matusissutigalugit akilersinneqarput. 1 mio. koruunit missaat Kalaallit Nunaanni kommuninut, inissiaatileqatigiiffinnut Inimut Iseritsimullu aammalu Nukissiorfinnut il. il. akiitsunut matusissutitut akilersinneqarput, sinneruttut 2,6 mio. koruunit Kalaallit Nunaanni Namminersorlutik Oqartussanut akiitsunut matusissutigineqarput.

Matumunnga peqatigitillugu 2016-imut akileraarutissat sinnerinut akiligassat 190,6 mio. koruunit akileraartartunit 10.355-init akileqquneqassapput. Taakkunannga 57,9 mio. k
oruunit missaat 2018-imut siumoortumik nalunaarsuinermut atatillugu ilanngunneqassapput sinnerilu 132,7 mio. koruunit pingasunngorlugit avillugit akiligassanngortinneqassapput ulluni 01/09, 01/10 aamma 01/11-2017-imi, kingusinnerpaamillu akilerneqareersimassallutik qaammatip akiliiffissap ulluisa 20-anni.

Akileraarutissat sinnerinut akiligassat 2018-imut siumoortumik nalunaarsuinermut ilanngussassat akilerneqarsinnaapput ulloq 20. november 2017 nallertinnagu, taamalu erniatut tapiliussassaq 6%-iusoq pinngitsoorneqarsinnaalluni. Tamaaliorsinnaaneq pillugu paasissutissat inaarummik naatsorsuummi takuneqarsinnaapput.

Akileraartartut akileraarpallaarutinit utertoorutinut akileraarutissallu sinnerinut akiligassanut tunngatillugu apeqqutissaqartut, inaarummik naatsorsuummik aamma akiitsunut akiliisitsiniarsimaneq pillugu nalunaarummik tigusaqareernermi kingorna, uunga saaffiginnissinnaapput: Kalaallit Nunaanni Namminersorlutik Oqartussat, Akileraartarnermut Aqutsisoqarfik, postboks 1605, 3900 Nuuk, oqarasuaat + 299 34 65 10, maili: tax@nanoq.gl

21/8-2017-imiit ukiumut akileraarfiusumut 2016-imut inaarummik naatsorsuutip assinga Sullissivik.gl -imi NemId atorlugu aaneqarsinnaalissaaq. Tassunga atatillugu aningaaserivinnut paasissutissat nalunaarutigisinnaavatit taamalu siunissami Akileraartarnermut Aqutsisoqarfimmiit aningaasanik pissaqassagaluaruit toqqaannartumik tunniuneqarsinnaalissapput.